Athletic-Osasuna jokatuko da igande honetan, otsailak 16, arratsaldeko 18:30etan, San Mames futbol zelaian. Bizkaiko eta Nafarroa Garaiko talde bien arteko partida IV. Euskal Herria Txapela 2019/20 edizioaren hamalaugarrena izango da, hau da, bigarren bueltako laugarrena.

Egun berean, igandean, IV. Euskal Herria Txapelako beste partida bat ere izango dugu: Eibar-Reala, arratsaldeko 14:00etan, Ipurua futbol zelaian.

Osasunaren eta Athleticen arteko lehen bueltako partida azaroaren 24an jokatu zen eta partida hartan bizkaitarrek 1-2 irabazi zuten Sadar futbol zelaian jokatutako lehian. Eta une honetan, sailkapenari begiratua, Athletic bigarren dago sailkapenean, 10 punturekin, eta Osasuna, laugarren, 4 punturekin, partida bat gutxiago jokatuta baina.

Sailkapenean, beraz, IV. Euskal Herria Txapelaren hamabi partida jokatuta, Reala dago buruan, hamabi punturekin. Bigarrenari, Athletici, puntu bi ateratzen dizkio, joan zen igandean Anoeta futbol zelaian Athletic 2-1 garaitu ondoren. Hartara, Athleticek 10 puntu ditu bigarren postuan. Biak ala biak bigarren bueltari goiko lekuetatik begiratuko diote, finala jokatzeko lekuetatik alegia. Hirugarrena, Alaves, 6 punturekin orain, joan zen igandean Mendizorrotzan Eibar 2-1 gainditu ondoren. Gero dator Osasuna, laugarren postuan, 4 punturekin, baina gainerako guztiek baino partida bat gutxiago jokatuta. Eta azken lekuan, Eibar, 2 punturekin.

Hurrengo partida

IV. Euskal Herria Txapela 2019/2020 edizio honen hurrengo partida, lehiaketako hamabosgarren jardunaldia, hurrengo astean jokatuko da, otsailaren 23an, igandean, arratsaldeko 14:00etan, Mendizorrotzan: Alaves-Athletic.