Bertan-behera geldiktu da igande honetan Ipuruan jokatzeko zen Eibar – Reala partida, Zaldibarko zabortegiko sutearen ondorioz, airean dioxinak eta furanoak daudeko.

Erabakia RFEF-eko Konpetizio Batzordeak hartu du gaur arratsaldean. Akordioaren testua osorik hemen irakur daiteke, PDF formatuan.

Hartara, Gipuzkoako talde bien arteko partida, IV. Euskal Herria Txapela 2019/20 edizioaren hamairugarrena alegia, orain ez dakigu noiz jokatuko den. Astearterako epea dute partidaren eguna zehazteko Eibarrek eta Realak. Ados jartzen ez badira, Konpetizio Batzordeak berak finkatuko du eguna.

Zaldibarko zabortegiaren sutearen keak ez du bakarrik Eibar-Reala partida galarazi. Eusko Jaurlaritzaren Osasuna Sailak adierazi du airearen egoera larria dela eta gomendatu du, besteren artean, kirol jarduerarik ez izatea airearen kutsadura mailak jaisten ez diren bitartean. Eibarren, Zaldibarren, Ermuan… bertan-behera gelditu dira asteburu honetako eskola kirola jarduerak ere.

Igandean, Athletic-Osasuna

Egun berean, igandean, IV. Euskal Herria Txapelako beste partida bat ere izango dugu: Athletic-Osasuna, arratsaldeko 18:30etan, San Mames futbol zelaian. 

Reala eta Eibarren arteko lehen bueltako partida azaroaren 30ean jokatu zen eta partida hartan Realak 4-1 irabazi zion Eibarri. Eta une honetan, sailkapenean, Reala dago sailkapenaren buruan, 12 punturekin, eta Eibar, azkenean, 2 punturekin.

Sailkapenean, beraz, IV. Euskal Herria Txapelaren hamabi partida jokatuta, Reala dago buruan, hamabi punturekin. Bigarrenari, Athletici, puntu bi ateratzen dizkio, joan zen igandean Anoeta futbol zelaian Athletic 2-1 garaitu ondoren. Hartara, Athleticek 10 puntu ditu bigarren postuan. Biak ala biak bigarren bueltari goiko lekuetatik begiratuko diote, finala jokatzeko lekuetatik alegia. Hirugarrena, Alaves, 6 punturekin orain, joan zen igandean Mendizorrotzan Eibar 2-1 gainditu ondoren. Gero dator Osasuna, laugarren postuan, 4 punturekin, baina gainerako guztiek baino partida bat gutxiago jokatuta. Eta azken lekuan, Eibar, 2 punturekin.

Arestian esan bezala, sailkapeneko azkenaren eta lehenaren arteko lehia izango dugu igandean Ipuruan. Gogora ekarri behar dugu, hala ere, joan zen urteko III. Euskal Herria Txapela Eibarrek jantzi zuela Realaren aurka jokatutako finalean hain zuzen ere. Beraz, aurretik ezin esango dugu igandean emaitza zein izango den. Talde bien aurtengo ibilibidea bestelakoa izan arren, gauza bat ziur esan dezakegu baina: biak aterako dira irabaztera.

Hurrengo partida

IV. Euskal Herria Txapela 2019/2020 edizio honen hurrengo partida, lehiaketako hamalaugarrena, otsailaren 16an bertan jokatuko da, igandean: Athletic-Osasuna 18:30etan San Mamesen.

Horren ondoren, hamabosgarren jardunaldia, hurrengo astean jokatuko da, otsailaren 23an, igandean, arratsaldeko 14:00etan, Mendizorrotzan: Alaves-Athletic.