Gozoa batentzat, gazia bestearentzat

Osasunak irabazi dio derbia Athletici San Mamesen, lehen zatian Oierrek sartutako golari esker. Etxekoek bi jaurtiketa egin dituzte langara eta zutoinera.

AITOR MANTEROLA

Ez dira irabazleak izaten ari Athletic eta Osasuna azkenaldian: zuri-gorriek bederatzi partida daramatzate irabazi ezinda, eta Osasunak bi baino ez ditu atera jardunaldi kopuru horretan. Athleticek hirugarren partida segidan galdu du gaur, eta Osasunak bigarren garaipen hori lortu du. Nafarrentzat izan delako gaur San Mamesko derbia. Ondorioz, sailkapenean, harrapatu egin du Jagoba Arrasateren taldeak Gaizka Garitanorena. 31na puntu dituzte.

Oier Osasunako kapitainak egin du gol bakarra, 29. minutuan, geldikako jokaldi baten. Gaur berragertu da Lizarrakoa hainbat partida jokatu ezinda egon eta gero, lesio baten eraginez. Athleticen hamaikakoan ere izan da nabarmentzeko kontu bat: debuta egin du Unai Vencedor erdilariak. Bestelakoan, bi taldeak atera dira erdiko hiru atzelarirekin. Ohikoa azkenaldian Athleticen estrategian; berrikuntza Osasunaren kasuan.

Osasunaren gola heldu arte, ez da kontatzeko ezer handirik gertatu. Golaren ondoren, zerbait gehiago sortu dute jokalariek. Jokaldi horietako batean, Williamsek gola sartu du, baina Gonzalez Fuertes epaileak baliorik gabe utzi du. Bigarren zatiaren hasieran, VAR-a azaldu da, Unai Garciak eskuarekin baloia jo eta gero: ez du faltarik ikusi epaileak, eta penaltia ere adierazi ez horrenbestez. Handik gutxira, Enric Gallego Osasunako jokalari berriak buruz burukoa izan behar zuen Unai Simonekin, baina Yeray jarri zaio parean. Bigarren erdiko lehen ordu laurden biziari akabera emateko, Vencedorrek langara egin duen falta jaurtiketa gertatu da. Etxekoek aukera garbienak azkenera izan dituzte: Caparen jaurtiketa, area barrukoa, Herrera atezainak atera du, eta Adurizen burukada zutoinera joan da. Hortxe bukatu dira Athleticen itxaropenak, Osasunaren poza hastearekin batera.