HERRI KIROLAK
Urrezko aizkolarien eta harri-jasotzaileen finalak, igandean Izarraitzen
![159889918_1584908978371451_7177736188137188694_n](https://ehkirola.eus/wp-content/uploads/2021/03/159889918_1584908978371451_7177736188137188694_n.jpg)
Urrezko Binakako XXII. Aizkolari Txapelketaren eta Urrezko Harrijasotze Txapelketaren finalak datorren igandean jokatuko dituzte Izarraitz pilotalekuan, 12:00etan hasita, ateak itxita, ikuslerik gabe eta COVID19 gaitzari aurre egiteko osasun neurriak zorrotz beteta burutuko den herri kirol saio mamitsuan.
Aizkorari dagokionez, Ibai Soroa-Txomin Amundarain, Hodei Ezpeleta-Goizeder Belza zein Suharri Rodriguez-Jokin Urretabizkaia Basozabal bikoteak finalean arituko dira nor baino nor gehiago txapela eskuratzeko asmoz. Bederatzi bikote aritu dira lehian Urrezko Binakako XXII. Aizkolari Txapelketan, eta esan bezala, horietatik hiruk neurtuko dituzte indarrak finalean, baina lehia estua egon zen azken unera arte, izan ere, beste bi bikote oso segundo gutxigatik geratu dira finaletik at.
Emakumezkoen aizkora txapelketan berriz, Nerea Sorondo, Maika Ariztegi, Uxue Ansoarregi eta Claudia Muñoz arituko dira lanean igande honetan. Txapelketa honetan ez da kanporaketarik izan eta lehiaketan zehar ibilitako kirolariak neurtuko dituzte indarrak finalean, egun txapelduna den Nerea Sorondo beratarra ordezkatzeko asmoz.
Eta azkenik, Aizkolari Gazteen Binakako Txapelketaren finala ere lehiatuko da, non Markel-Zapiain-Axel Larrañaga, Xuban Kañamares V.a-Ibon Garaiburu eta Oier Larretxea-Endika Goia bikoteak elkarren aurka lehiatuko diren.
Bestalde, Urrezko Harrijasotze Txapelketaren finala jokatuko dute Azpeitian. Hamar harri-jasotzaile zortzi arroako hiru harrirekin aritu dira orainarte txapelketa lehiatzen, eta finalerako txartela horietako hiruk eskuratu dute: Mikel Lopetegi Urra, Beñat Telleria eta Inhar Urruzuno. Horiek hiru minutuko txandan jaso beharko dituzte ehun kiloko kopa, ehun kiloko kubikoa eta ehun kiloko bola.
Halaber, Emakumezkoen harrijasotze saioa ere egingo da Izarraitzeko jaialdian, Karmele Gisasola Zelai III.a, Udane Ostolaza eta Aroa Sanchez arituko direlarik harri ezberdinak bizkarreratzen.
Gaztedi A taldeak irabazi du Euskadiko 640 kiloko sokatira txapelketa
Lehiaketako hiru jardunaldietan bere nagusitasuna erakutsi ondoren, Gaztedi A taldeak txapela janztea lortu du
Andoni Iruretagoiena eta Gorka Etxeberria nagusi Binakako III. Euskal Pentatloian
Nagusitasunez irabazi zuten norgehiagoka, eta 40 segundotan hobetu zuten aurrez ezarria zegoen marka
Aimar Irigoienek irabazi du Etxauri Harria
Errezildarrak 18 jasoaldirekin marka berria ezarri du eta Jokin Eizmendik eta Goenatxok osatu dute podiuma