Aurten lehiatzekoa zen Iruritako Mendi Duatloiaren hirugarren edizioa bertan behera geratu da

Iruritako herriak, 2020ko maiatzaren 16ean hirugarren aldiz “Iruritako Mendi Duatloia” antolatu behar zuen baina koronabirusak sorturiko egoerak egitasmoa zapuztu egin du.

Iruritako mendi duatloia lasterketa herrikoia da, maila guztietako kirolarientzako pentsatuta dagoena. Baztango bailaran eta inguruan mendiak eta kirolak gaur egun duten arrakastak bultzatuta, herriko gazte batzuk animatu ziren kirol jarduera txiki hau aurrera ateratzera eta aurtengoa dagoeneko hirugarren edizioa izan behar zuen.

Aurtengo edizioan, lasterketa bakarka, bikoteka edo bizikleta elektrikoarekin egiteko aukera zegoen.

Lasterketako ibilbidea bitan banatua zuten eta probaren hasiera eta amaiera herriko plazan kokatua zegoen:

-Lehenengoa, 10,5 kilometro luzera eta 450 metroko desnibela duen ibilbidea da eta kirolariek lasterka egin beharko zuten .

-Bigarrena, 20 kilometroko luzera eta 800 metroko malda duen itzulia mendi bizikletan egitekoa.

Araudiaren arabera, proba guztia bakarka edo bizikleta elektrikoarekin egiten duenak, 30,5 kilometroak norberak egin beharko ditu. Proba bere osotasunean bukatzeko (bai bakarka eta bai bikoteka) denbora epea 14:00ak artekoa izatea ezarria zuten antolatzaileek.

Duela bi urteko edizioan 128 kirolarik parte hartu zuten eta joan den urtean 206 lagunek osatu zuten ibilbidea, aurten ere partehartze polita espero zelarik.

Antolakuntzak adierazi duenez, orain arte izena emanda zuten kirolari guztiei dirua bueltatuko zaie, nahiz oraindik itzultze prozesua nola egingo duten aztertzen dauden, jakin bezain pronto jakinaraziko dutelarik.

Ereñotzuko Mendi Lasterketa, datorren urtera atzeratu da

Bertan behera gelditu da ere Ereñotzuko Mendi Lasterketaren aurtengo edizioa. Maiatzaren 31n egitekoa zen mendi lasterketa honen 10.edizioa, urtero moduan San Antonio jaien aurretik, baina koronabirusak eragindako egoera honen aurrean, lasterketa ez egiteko erabakia hartu du antolakuntzak.