HERRI KIROLAK/AIZKORA
Iker Vicentek irabazi du 2021eko Nafarroako aizkora txapelketa
![267487938_1790379957824351_8345202658464882865_n](https://ehkirola.eus/wp-content/uploads/2021/12/267487938_1790379957824351_8345202658464882865_n.jpg)
Iker Vicentek irabazi du zazpigarren aldiz segidan Nafarroako aizkora txapelketa
Nafarroako Herri Kirol Federazioak antolatuta, eta Beintza Labaiengo udalaren laguntzarekin, pasa den igandean, abenduaren 12an, eguerdiko 12:00etan, Beintza-Labaienen jokatu zen Nafarroako aizkolarien lehen mailako Nafarroako txapelketaren finala.
Hilaren 12an Lekunberrin jokaturiko kanporaketan sailkatutako bost aizkolari izan ziren bertan aurrez aurre: Iker Vicente (Otsagabia), Eneko Saralegi (Errazkin), Julen Olano (Leitza), Jon Rekondo (Leitza) eta Joxean Etxeberria (Ziga).
Giro bikaina egon zen, eguraldiari dagokionez zein bertaratu ziren ikusleen kopuruagatik. Lehia hasi aurretik, Donato Larretxeari omenaldia eskaini zitzaion, herriko lagun talde baten eskutik, aizkora munduan egindako ibilbideagatik.
Larretxeaz aparte, Nafarroan txapeldun handiak izan dira, esaterako Martin Gartziarena, Ramon Latasa, Migel Berakoetxea, Patxi Astibia, Miel Mindegia, Floren Nazabal… baina orain Iker Vicenteren aroa da.
Otsagabiako aizkolariak zazpigarrenez jarraian jantzi zuen Nafarroako txapela, lau kanaerdiko, lau 60 ontzako eta bi oinbiko 33 minutu eta 53 segundotan ebaki ondoren. Joxan Etxeberria bigarrena izan zen eta Eneko Saralegik osatu zuen podiuma.
Vicente faborito argia zen eta ez zuen hutsik egin, garaipen erosoa erdietsi zuelarik. Bigarren posturako aurreikusi zitekeen lehiarik estuena, baina ez zen holakorik izan eta azkenean nahiko erraz eskuratu zuen Zigako Joxean Etxeberriak (36.16). Eneko Saralegi izan zen hirugarren (37.45), laugarren postuan Jon Rekondo leitzarra gelditu zen (39.12) eta lehen aldiz txapelketa honetako finalean parte hartzen zuen Julen Olano leitzarra bosgarren sailkatu zen (39.39).
Nafarroako Lehen Mailako Aizkora Txapelketaren sailkapena
Iker Vicente, 33.53
Joxean Etxeberria, 36.16
Eneko Saralegi, 37.45
Jon Rekondo, 39.12
Julen Olano, 39.39
Luixa Uzkudunek eta Mikel Lizartzak irabazi dute Sega Ligako bigarren jardunaldia
Euskal Herriko XII. Bakarkako Sega Ligari datorren ekainaren 11n Oiartzunen emango zaio amaiera
Banakako pentatloi txapelketaren lehen kanporaketa jokatu da Tolosan
Xabier Zaldua, Ioritz Gisasola Zelai V.a, Jokin Urretabizkaia eta Aitzol Atutxa pasa dira bigarren kanporaketara
Urrezko Banakako Aizkolarien finalerdia jokatu zen Lekunberrin
Mikel Larrañaga, Iker Vicente eta Julen Alberdi Txikia IV.a sailkatu ziren finalera