MENDI LASTERKETAK

Igartzan hasiko da 2020ko Euskal Herriko Mendi Duatloi Zirkuitua, irailaren 12an

2020/09/11

Azkenean, Igartzan emango zaio hasiera 2020ko Euskal Herriko Mendi Duatloi Zirkuituari, datorre larunbatean, irailak 12. Zirkuituaren lehenbiziko etapa Igantzin egitekoa zen pasa den larunbatean, irailak 5, baina koronabirusa dela eta, hitzordua bertan behera uztea erabaki zuten.

Bizi dugun egoera kontutan hartuta, Igartzako duatloia neurri berezipean lehiatuko da, osasun protokoloa zorrotz mantenduko da eta anoa guneak ezabatu egin dira, lasterketa amaitu ostekoa soilik mantenduz.

Igartzako Duatloia

Antolatzaileak: Igarloi Elkartea eta Beasaingo Udala

Data: Irailak 12, Larunbata

Irteera ordua: 16:00

Probaren ezaugarriak:

1. Sektorea: 4,23 km-ko mendi lasterketa
2. Sektorea: 13,72 km mendi bizikletaz
3. Sektorea: 2,93 km-ko mendi lasterketa

Euskal Herriko Mendi Duatloi Zirkuituko hurrengo probak Urduñan (Araba) eta Arriaranen (Gipuzkoa) lehiatuko dira, irailaren 19 eta 26an, hurrenez hurren.

Behin iraila pasata, urrian beste bost hitzordu daude aurreikusita: Zegama-Aizkorrin hilaren 3an, Ibarran 10ean, Arespalditzan 17an, Amasan 24an eta Zeanurin 31n. Azaroan Adunan lehiatu beharreko probaren data ez dute jakitera eman, egutegia zabalik dagoelako eta beste probaren bat sartuko balitz data aldatu beharko litzatekeelako, zehaztuta baitago Adunakoa zirkuituko azken proba izango dela.

Aurtengo egoera berezia dela eta, Zirkuituko probek ezohiko formatua izango dute eta aurreko urteetako probekin alderatuz funtsezko aldaketa batzuk izango dituzte:

-Kobid-19aren aurkako protokoloa zorrotz jarraitu beharko da eta hau betetzen ez duen parte-hartzailea probatik kaleratzeko boterea izango du lekuko antolakuntzak.

-Izen-emate guztiak on-line egingo dira KIROLPROBAK webgunean. Proba egunean, lekua egongo balitz, izen-ematea gauzatzea aztertzen ari gara, beti ere modu telematikoan.

-Prebentzio neurriei aurre egiteko gastu extra batzuk izango ditugunez, inskripzioak 15€tik 20€ra igotzea erabaki dugu eta bikoteetan 25€tik 30€ra.

-Anoa posturik ez da izango ibilbidean zehar, amaieran bai. Bero handia eginez gero ura jartzea baloratuko da.

-Jende pilaketa saihesteko proba amaierako festarik ez da egingo. Aurten, kirola eta osasuna lehenetsiko ditugu festaren gainetik.

-Zirkuituko behin behineko sailkapen orokorrak egingo baditugu ere, burutuko diren proben arabera, 2020ko EHMDZko txapeldunak izendatu ala ez baloratuko dugu.

-Behin behineko egutegian ditugun proben IZEN-EMATEAK, hauek ospatu baina bi aste lehenago zabalduko ditugu edo BERTAN BEHERA utzi. Ez da guztiok nahiko genukeen egoera baina dugun ziurgabetasuna ikusita, erabaki hori ezin dugu lehenago hartu.

Share This