EUSKAL PILOTA
Astelehen honetan hasiko da Sagardoaren Txapelketa
Sagardoaren Txapelketaren aurtengo edizioa berezia izango da kirola eta telebista saioa uztartuko baitira, izan ere, ETB1n astelehenero ERREMONTARI saio berria eskainiko da eta txapelketaren partiduak izango dira saioko ildo nagusia.
Bertan, Sagardoaren txapelketa guztia emititzeaz gain elkarrizketak eta erremontearen ikuspuntu berriak ezagutuko dira, teknologia berriak erantsiz, erremontearen modalitatea ezagutaraztea izango delarik helburu nagusia. Apirilaren 12tik aurrera, astelehenero 22.15ean ETB1en eskainiko da eta bi orduko iraupena izango du prime-timean.
Guztira sei bikote lehiatuko dira XI. Sagardoaren Txapelketan, sei sagardotegi ordezkatuko dituztelarik: Etxarri-Barrenetxea IV.a (Oialume Zar), Juanenea-Zubiri (Larre-Gain), Urriza-Zaldua (Bereziartua), Goikoetxea V.a-Aizpuru III.a (Gurutzeta), Segurola-Larrañaga (Gaztañaga) eta Ansa II.a-Labaka (Setien).
Txapelketa sistemari dagokionez, bikote guztiek denen aurka jokatuko dute hasierako ligaxkan, bertako lehen lau sailkatuak finalerdietara pasako dira eta bi bikote kanporatuak izango dira.
Partida guztiak 30 tantora jokatuko dira eta sailkapena puntuen bidez erabakiko da. Garaileak lau puntu batuko ditu, 29-27 tanto artean geratzen denak bi, 26tik-24 tantora puntu bakarra, 23tik 17 tantora punturik ez eta 16 edo tanto gutxiago egiten dutenei puntu bat kenduko zaie.
Finalerdiak maiatzaren 31n jokatuko dira eta finala ekainaren 7rako dago iragarria, astelehenero bi partida jokatuko direlarik.
Lehenengo jardunaldia astelehen honetan, apirilaren 12an, izango da: Urriza-Zalduak (Bereziartua) Etxarri-Barrenetxearen (Oialume Zar) kontra jokatuko dute lehenengo partidan eta ondoren Ansa II.a-Labaka (Setien), Juanenea-Zubiriren (Larre-Gain) kontra.
Petritegi sagardotegia, 2019ko azken txapelduna, protagonismo berezia izango du edizio honetan. Azken txapelduna izan zenez, aurten Petritegik bikote guztietan izango du presentzia eta gainera, txapelketan zehar, pilotari onena (aurrelaria eta atzelaria) erabakiko duen rankingaren ordezkaria ere izango da.
Emakume Master Cup txapelketako txapelak jantzi dituzte Leire Etxaniz eta Miriam Arrillagak
Bi irabazleak jaun ta jabe izan ziren ta merezita erdietsi zuten garaipena
Iparraldeko finalerako txartelak zehaztu dira Iruran, Xarearen festan
Finala abenduaren 21ean, Senperen jokatuko da, Joxi Lopetegi eta Mikel Funosasek Driolet eta Sistiagueren aurka lehiatuko direlarik
Iparraldeko Xareko Ligako finalerdiak, larunbatean Iruran
Munduko jokaliririk onenak arituko dira Iruran xarearen eta herriaren arteko harremanaren urteurrena betetzen delarik