Goenatxo I.aren omenaldia gogoan, aparteko txapelketa lehiatu zen atzo Asteasun eta Aimar Irigoienek irabazle atera zen. Besteak beste, Inaxio Perurena eta Joseba Ostolaza 200 kiloko harri errektangularrarekin aritu ziren lanean.

Atzo jokatu zen, Asteasuko frontoian, 200 kiloko lauki zuzenaren bueltan antolatutako txapelketa berezia. Aimar Irigoien errezildarra izan da onena, 17 altxaldi eginda 3 minutuko bi txandatan. Bigarren postua Jokin Eizmendik lortu du 16 altxaldirekin, eta hirugarrena Inaxio Perurenak, 15 altxaldirekin. 200 kiloko harri errektangularrarekin norgehiagoka 12:00etan hasi da eta ETBk zuzen-zuzenean eman du.

Ezin da ukatu txapelketa zeharo berezia izan dela honakoa, batetik duela ia 30 urte jokatu zen txapelketa bat eredu gisa hartu delako eta bestetik partehartzaileen izenagatik.

Berreskuratu den txapelketa hura Goenatxo I.aren omenaldia izan zen, duela 29 urte eta erdiko kontua, orduko hartan ere 200 kiloko errektangularrarekin txapelketa jokatu zelarik. Geroztik eta atzorarte ez zen horrelakorik berriro jokatu.

Oraingoan, orduko arau berdinak jarri dituzte, hiru minutuko bi txanda izan ditu harri jasotzaile bakoitzak, orotara hamabi partehartzaile izan direlarik: Joseba Ostolaza (Goenatxo I.aren omenaldi hartan egon zen harri jasotzaile bakarra), Inaxio Perurena (bere lehen txapelketa izan da), Aimar Irigoien, Jokin Eizmendi, Julen Diaz, Xabier Aranburu, Aimar Galarraga, Xabier Peñagarikano, Iñigo Eizagirre, Gorka Etxeberria, Goenatxo III.a eta Martin Mendizabal.

Ikusmin handia sortu zuen aurkezpenean, eta zale sutsuenek ez dute huts egin. Jendez lepo zegoen frontoia, eta askok, zutik ikusi behar izan dute 12 harri jasotzaileek eskainitako saioa.Duela hiru hamarkada, 16 harri jasotzaile aritu ziren lanean. Esan bezala, gaur ere, orduko arau berdinak zituzten parte hartzaileek: hiru minutuko bi txandatan jasoaldi gehien lortzen zituena izango zen txapeldun. Bi txandak amaituta, Irigoienek 17 aldiz altxatu du harria (lehen txandan, 8; bigarren txandan, 9); Eizmendik, 16 aldiz (bi txandetan 8 aldiz); eta Perurenak, 15 aldiz (lehenean, 7; bigarrenean, 8).