EUSKAL PILOTA

UTS Master Txapelketa gaur hasiko da bi finalerdiekin

2021/01/24

Argazkiak: Oriamendi.eus

Buruz Buruko Master Txapelketa gaur hasiko da, eguerdiko 12:00etan, bi finalerdiekin 

 

Lau erremontista lehiatuko dira finalerdietan. Buruz buruko txapelketa nagusian, lehenbiziko lau postutan geratu ziren pilotariak izango dira parte hartzaileak. Aurten, Endikaren baja dela eta 5. postuan geratu zen pilotariak hartuko du parte, Ansa II.ak.

Gaurko lehenengo partiduan ariko da Barrenetxea IV.a. Atzelari hernaniarrak pasa den urtean txapela hau jantzi zuen eta txapelaren defentsan, lehenengo finalerdian, Juanenea izango du aurkari. Nahiz eta Master txapelketako txapeldun izan, pasa den udaran galdu egin zuen Juanenearen aurka 30-21. Beraz, Barrenetxeak arantza hori atera nahiko du. Gainera Buruz Buruko Txapelketa nagusian jokatutako hiru partiduak galdu zituen eta 2019ko sentsazio onak berreskuratu nahi ditu. Ez da erraza izango garaipena. Juanenea saldiastarrak erakutsi zuen uztaila, abuztua eta irailean zehar joko maila oso altua duela eta banakakoan ederki moldatzen dela.

Bigarren partiduan, Urriza txapeldun haundia Ansaren aurka neurtuko da. Endikak hiru hilabeteko atsedena hartu du eta bere lekua txapelketan Ansa urnietarrak hartu du. Urriza da faborito nagusia txapela janzteko eta gaur finalera sailkatzeko ere bai. Gogoratu, finala datorren larunbatean jokatuko dela, gaueko 11:00etan, gaurko irabazleen artean.

Aurtengo txapelketaren berrikuntzarik nabarmenenak egutegia eta ordutegia izango dira. Esan bezala, finalerdiak igande honetan, urtarrilaren 24an, jokatuko dira eguerdiko 12:00etan hasita. Artxibategira joan beharko litzateke jakiteko noizbat jokatu ote den igande eguerdian. Bestetik, finala, urtarrilaren 30ean, larunbatean jokatuko da, baina ordutegia ere ez da ohikoa izango, gaueko 23:00etan jokatuko baita. Partidu guztiak ETB1ek eskainiko ditu zuzenean.