HERRI KIROLAK/AIZKORA/HARRIA
Urrezko Banakako Aizkolarien lehen kanporaketa lehiatu da
Larunbat honetan, Diva Pentsuak enpresak eta Leaburu-Txaramako Udalak antolatuta, Urrezko Banakako Aizkolari Txapelketa Eusko Label Sariko lehen kanporaketako saioa jokatu da Leaburuko industrialdean, 11:30ean hasita.
Hamabi aizkolari aritu dira bertan: Urtzi Olasagasti, Ibon Garaiburu, Dani Lopez, Xabier Garcia Utxu, Beñat Lekue, Aritz Oregi, Beñat Amade, Mikel Agirre, Aritz Irazabal, Ioritz Gisasola Zelai IV.a, Jon Telletxea eta Josu Santamaria. Egin beharreko lanak, zortzi enbor ahalik eta azkarren moztea, lehen hirurak hurrengo faserako sailkapena eskuratzen zutelarik.
Lehen fasean, hiru multzotan banatu zituzten aizkolariak, eta multzo bakoitzeko bi onenek egin zuten aurrera: A multzotik, Zelai IV.ak eta Mikel Agirrek; B multzotik, Lopezek eta Garaiburuk; eta C multzotik, Lekuek eta Irazabalek.
Gero, buruz-buruko lehian aritu ziren sei aizkolariak: Ibon Garaiburu Zelai IV.aren aurka, Dani Lopez Aritz Irazabalen aurka eta Beñat Lekue Mikel Agirreren kontra.
Azkenean, Zelai IV.a, Irazabal eta Lekue sailkatu ziren eta datorren asteburuan Zumaian jokatuko den kanporaketan izango dira.
Gizonezkoen txapelketaz gain, Emakumezkoen Aizkolari Txapelketako kanporaketa ere jokatu zuten Laiene Pikabeak eta Uxue Ansorregik. Launa enbor moztu behar zituzten, lehena, erlojuaren aurka, eta ondorengo hirurak abiadurako proban. Bietan ere Pikabea izan zen onena, eta berak egin du aurrera txapelketan.
Azkenik, harri-jasotzaileen txanda izan zen. Berez, Urrezko Harri-jasotze Txapelketako kanporaketa jokatu behar zuen Julen Diazek, baina azkenean, erakustaldia eskaini zuen.
Emakumezkoetan, Karmele Gisasola Zelai III.ak, txapelketako kanporaketa jokatu zuen, 63 kiloko kubikoa eta pisu bereko bolarekin, bi minutu txandetan. 15 jasoaldi eman zizkion kubikoari eta bolari, berriz, 23 jasoaldi.
Urrezko Aizkolarien Kopako jardunaldia lehiatu da Burgelun
Xabier Zalduak eskuratu zuen hurrengo kanporaketarako txartela, finalean hiru kanaerdikoak mozten azkarrena izan ondoren
Bizkaiko Binakako aizkora eta taldekako harrizulatzaile txapelketak Basaurin
Aitzol Atutxa eta Unai Aldape binakako aizkora txapelketan eta Burdin Gazteak, taldekako harrizulatzaile txapelketan, Bizkaiko txapeldun berriak
Binakako harri-jasotze txapelketako jardunaldiak jokatu dira Araban
Hirugarren eta laugarren jardunaldiak jokatu zituzten asteburuan , larunbat arratsaldean Agurainen eta igande eguerdian Aramaion