HERRI KIROLAK/AIZKORA

Bizkaiko Binakako aizkora eta taldekako harrizulatzaile txapelketak Basaurin

by | 2020/10/28

Argazkiak: egursport.com

Aitzol Atutxa eta Unai Aldape Bizkaiko binakako aizkora txapelketan eta Burdin Gazteak, taldekako harrizulatzaile txapelketan, Bizkaiko txapeldun berriak

 

Pasa den igandean, urriaren 25ean, eguerdiko 12:00etan hasita, Basauriko San Miguel auzoko frontoian lehiatu ziren Bizkaiko Binakako Aizkora txapelketa eta Bizkaiko Harrizulatzaileen txapelketa, ikusleentzako aforoa mugatua zegoelarik.

Lehendabizi aizkolariak aritu ziren nor baino nor gehiago,  eta behin aizkolarien neurketa bukatuta eta sari banaketa eginda, harrizulatzaileen txanda etorri zen.

Binakako aizkora txapelketan honako bikoteak aritu ziren: Atutxa II.a-Aldape, Larrea III.a -Gisasola “Zelai IV.a”, Ezpeleta-Ezpeleta, Naredo-Irazabal, Lekue-Oregi  eta Utxu-Mendieta.

Egin beharreko lanak, guztira zortzi enbor moztea: 54 ontzako sei enbor eta 60 ontzako beste bi.

Azkenean, Aitzol Atutxak eta Unai Aldapek osatutako Dimako bikoteak lortu zuen txapela, Unai Aldaperen lan onari esker Atutxa II.ak honakoan ere txapela etxera eraman zuelarik.

Sailkapena honela geratu zen:

  1. Aitzol Atutxa-Unai Aldape (14 minutu eta 47 segundo)
  2. Julen Larrea-Ioritz Gisasola “Zelai IV.a” (16 minutu eta 4 segundo)
  3. Aritz Irabazal-David Naredo (16 minutu eta 34 segundo)
  4. Ernesto Ezpeleta-Hodei Ezpeleta (19 minutu eta 34 segundo)
  5. Aritz Oregi-Beñat Lekue (21 minutu eta 15 segundo)
  6. Julen Mendieta-Xabier Garcia UTXU (23 minutu eta 49 segundo)

Harrizulatzaileen txapelketan berriz, honako taldeek neurtu zituzten indarrak: Gallarta, Piratak (Arratzu), Burdin Gazteak (Ortuella) eta Kabiezes (Santurtzi).

30 minutuko lanak amaituta, Ortuellako Burdin Gazteak taldeak eskuratu zuen Bizkaiko Taldekako Harrizulatzaile txapelketako lehenengo postua:

  1. Burdin Gazteak (10 zulo, 1 cm., 10mm.)
  2. Kabiezes (9 zulo, 75mm.)
  3. Gallarta (6 zulo, 66 mm.)