HERRI KIROLAK/AIZKORA
Urrezko Aizkolarien Koparen kanporaketa lehiatu dute Etxebarrin
![264202055_1784208185108195_133123205437550301_n](https://ehkirola.eus/wp-content/uploads/2021/12/264202055_1784208185108195_133123205437550301_n.jpg)
Pasa den larunbatean, abenduak 4, jokatu zen Etxebarrin (Bizkaia) Urrezko Aizkolarien Kopako bigarren kanporaketa, 18:00etan hasita, honako aizkolariak aritu zirelarik lanean: Patxi Mindegia, Txomin Amundarain, Juanjo Lopez Azpilikueta, Julen Olano, Jon Rodriguez II.a, Iosu Santamaria, Ibai Soroa eta Suharri Rodriguez. Egin beharreko lana, lau kana erdiko enbor ahalik eta azkarren moztea, lehen hiru sailkatuek sailkatzen zirelarik hurrengo faserako.
Hain zuzen, azaroaren 20an Larraulen jokatu zuten lehen kanporaketatik sailkatu ziren lehia honetarako Santamaria eta Rodriguez. Jardunaldi hartan hamar aizkolarik hartu zuten parte (Luis Polanco, Aritz Irazabal, Ramiro Llanos, Asier Larrañaga, Jon Rodrigez, Unai Zabala leaburuarra, Josu Santamaria, Endika Goya, Oier Larretxea eta Mikel Agirre), eta horietarik aipaturiko biek lortu zuten txapelketan jarraitzeko txartela.
Etxebarriko saioari dagokionez, bi taldetan banatuta aritu ziren aizkolariak, emaitzak honakoak izan zirelarik:
A taldea: Patxi Mindegia (6´17´´), Aritz Irazabal (7´14´´), Txomin Amundarain (7´17´´) eta Juan Jose Lopez Azpilikueta (8´53´´).
B taldea: Suharri Rodriguez (6´59´´), Ibai Soroa (7´02´´), Jon Rodriguez II.a (7´57´´) eta Iosu Santamaria (10´18´´).
Gauzak horrela, hurrengo kanporaketarako sailkatu direnak, multzo bakoitzeko lehena (Patxi Mindegia eta Suharri Rodriguez) eta bigarren onena (Ibai Soroa) izan dira.
Urrezko Aizkolarien Kopaz gain, Binakako Harrijasotze Txapelketa ere jokatu zuten, non Iraitz Arruti-Xabat Olaizola eta Urdax Magunazelaia (Aimar Galarraga ordezkatuz)-Jon Unanue Goenatxo III.a bikoteak aritu ziren.
Azkenean Goenatxok eta Magunazelaiak 11.476 kilo altxatu zituzten, 100 jasoaldi burututa (11 laukizuzenari, 23 kopari, 37 kubikoari eta 39 bolari), eta Arruti eta Olaizolak berriz, 10. 937 kilo altxatu zituzten, 94 jasoalditan (13 laukizuzenari, 23 kopari, 24 kubikoari eta 34 bolari).
Bi lehiaketen finalak Asteasun (Gipuzkoa) jokatuko dira abenduaren 31n.
Halaber, Emakumezkoen Trontzalari Txapelketako hirugarren kanporaketa ere lehiatu zen, Maria Iraizoz-Ainhoa Iraizoz eta Irune Biurrun-Olatz Altuna bikoek neurtu zituztelarik indarrak. Hamar ebaki egin behar izan zituzten eta azkarrenak Iraizoztarrak izan ziren, 5 minutu eta 19 segundo erabili zituztelarik lanak amaitzeko eta aurkariak berriz, 6 minutu eta 14 segundo.
Gaztedi A taldeak irabazi du Euskadiko 640 kiloko sokatira txapelketa
Lehiaketako hiru jardunaldietan bere nagusitasuna erakutsi ondoren, Gaztedi A taldeak txapela janztea lortu du
Andoni Iruretagoiena eta Gorka Etxeberria nagusi Binakako III. Euskal Pentatloian
Nagusitasunez irabazi zuten norgehiagoka, eta 40 segundotan hobetu zuten aurrez ezarria zegoen marka
Aimar Irigoienek irabazi du Etxauri Harria
Errezildarrak 18 jasoaldirekin marka berria ezarri du eta Jokin Eizmendik eta Goenatxok osatu dute podiuma