HERRI KIROLAK/AIZKORA

Urrezko Aizkolarien Kopako finalerdiak jokatu dira

by | 2021/12/13

Argazkiak: egursport.com

Pasa den asteazkenean, abenduak 8, jokatu zen Aiako probalekuan Urrezko Aizkolarien Kopako hirugarren kanporaketa, eguerdiko 12:00etan hasita, honako aizkolariak aritu zirelarik lanean: Jokin Urretabizkaia “Basozabal”, Hodei Ezpeleta, Julen Gabirondo, Andoni Iruretagoiena “Izeta VI.a”, Oier Kañamares IV.a, Xuban Kañamares V.a, Iban Resano, Luis Txapartegi, Xabier Zaldua,  Patxi Mindegia, Suharri Rodriguez eta Ibai Soroa.

Horietarik lehen sei sailkatuek finalerdietarako txartela eskuratu zuten, lau kanaerdiko mozteko lan gogorraren ondoren: Julen Gabirondo, Patxi Mindegia, Jokin Urretabizkaia, Hodei Ezpeleta, Suharri Rodriguez eta Xabier Zaldua.

Igande honetan berriz, leku eta ordu berean jokatu dira finalerdiak arestian aipaturiko sei aizkolari horien artean. Egin beharreko lana, sei kana erdiko enbor ahalik eta azkarren moztea, lehen hiru sailkatuek finalerdietarako txartela eskuratzen zutelarik.

EMAITZAK

  • Jokin Urretabizkaia Basozabal 10´54´´
  • Hodei Ezpeleta 11´27´´
  • Xabier Zaldua 12´46´´
  • Julen Gabirondo 13´17´´
  • Suharri Rodriguez 15´39´´
  • Patxi Mindegia Erretiratu egin zen

Emaitza hauekin beraz, honakoak sailkatu dira Urrezko Aizkolarien Kopako finalera: Jokin Urretabizkaia Basozabal, Hodei Ezpeleta eta Xabier Zaldua.

Urrezko Aizkolarien Kopaz gain, Binakako Harrijasotze Txapelketa ere jokatu zuten, non Jokin Eizmendi-Gorka Etxeberria eta Jon Unanue Goenatxo II.a-Xabat Olaizola bikoteak aritu ziren.

Eizmendik eta Etxeberriak  12.314 kilo altxatu zituzten, 105 jasoaldi burututa (18 laukizuzenari, 22 kopari, 28 kubikoari eta 37 bolari). Goenatxok eta Olaizolak berriz, 11.964 kilo 103 jasoalditan (14 laukizuzenari, 24 kopari, 28 kubikoari eta 37 bolari).

Txapelketako lehen fasea amaitu ostean, aurreneko hiru sailkatuek eskuratu dute finalean aritzeko eskubidea: Mikel Lopetegi Urra- Iñigo Eizagirre Eiza (24.366 kilo), Eizmendi-Etxeberria (23.728 kilo) eta Goenatxo-Olaizola (23.440 kilo).

Share This