MENDIKO LASTERKETAK

Nahia Quincoces-Igone Campos eta Aitor Ajuria-Asier Alonso, Binakako Eski txapeldunak

2022/03/22

Argazkiak: emf.eus

Nahia Quincoces eta Igone Campos, emakumezkoetan, eta Aitor Ajuria eta Asier alonso, gizonezkoetan, Binakako Euskadiko Eski txapelketan garaile. Euskal Selekzioko emakumezkoen bikoak ere garaipena lortu zuen 2022ko Gran Altitoy-Ternua lasterketan

 

Eskiari dagokionez, asteburuko hitzordua Altitoy Ternua Handian zegoen jarrita. Larunbatean Euskadiko Eski Txapelketa jokatu zen, binaka, eta igandean Altitoy-Ternua 2022 proba egin zen, Barages Luz Ardiden, Pic du Midi eta Tourmalet tontor mitikoetan.

Euskadiko Binakako Eski Txapelketari dagokionez, gizonezkoetan, Aitor Ajuriak eta Asier Alonsok osatutako Euskal Selekzioko bikotea jaitsi zen azkarren, 3:05:06ko denbora erabili zutelarik ibilbidea betetzeko. Atzetik, baina oso gertu, Joan Ander Aranburu eta Rafa Urbizu podiumeko bigarren tiraderara igo ziren.

Emakumezkoetan berriz, Euskal Selekzioko Nahia Quincoces eta Igone Campos eskiatzaileek garaipena erdietsi zuten, Maddi Arrazola eta Janire Agirreren aurretik helmugaratuz.

SAILKAPENAK

GIZONEZKO SENIORRAK

  1. Aitor Ajuria eta Asier Alonso
  2. Jon Ander Aranburu eta Rafa Urbizu
  3. Aitor Otxoa eta Lander Álvarez

EMAKUMEZKO SENIORRAK

  1. Nahia Quincoces eta Igone Campos
  2. Maddi Arrazola eta Janire Agirre

GIZONEZKO BETERANOAK

  1. Aitor Otxoa eta Lander Alvarez
  2. Ángel Olaso eta Roberto Milukua
  3. Luismi Hernando eta Enrique Zamorano

Bestalde, igandean frogatuta geratu zen Altitoy-Ternua euskal eskiatzaileen erreferentziazko proba izaten jarraitzen duela Pirinioetan, eski-giroa paregabea baita bertan, eta euskal ordezkaritzaren garaipenak ohikoak direlako.

Nazioarteko zirkuituari atxikitako lehiaketaren barruan, Altitoy-Ternua diziplina honetako 5 proba onenen artean dago, eta emakumezkoetan Nahia Quincoces eta Igone Campos Euskal Selekzioko eskiatzaileek nagusitasunez irabazi zuten, 6:54:13ko denborarekin. Gizonezkoetan Martin Stofner eta Filippo Beccari italiarrak izan ziren lehenak helmugan 5:17:28ko denborarekin. Lasterketako maila bikaina dela eta, oso azpimarragarria da euskal selekzioaren kideen jarduna: zazpigarren postua Asier Alonso eta Aitor Ajuriarentzat eta hamaikagarrena Jon Ander Aranburu-Rafa Urbizu bikotearentzat. Beteranoetan Yoann Caillotek eta Lionel Bouzonek osatutako bikotea izan zen irabazlea, eta podiumera iritsi ziren, zehazki, hirugarren postuan, Aitor Otxoa eta Lander Álvarez.

Lehiaketa herrikoian, B ibilbide batean, berriz ere euskal eskiatzaileak izan ziren nagusi parte hartu zuten 73 bikoteen artean. Ander Uriarte (Pol-Pol Mendizale Taldea) eta Ainara Uribarri (Zortzietakoak KE) izan ziren azkarrenak 4:22: 27ko denborarekin.

Share This