Nafarroa Arenak emakumezkoen lehen pilota jaialdia hartuko du larunbatean

Euskal Herriko pilotalekurik handiena den Nafarroa Arenak berriz ere ateak zabalduko ditu uztailaren 3an, emakumezkoen esku pilotako lehen jaialdia hartuko duen egun historikoan, izan ere, Nafarroako Foru Komunitateko Txapelketaren eskuzko pilota mistoko finalak jokatuko dira bertan, gazteen eta eliteen mailan. Txapelketak, oraingoz, helburu nagusia lortu du, hau da, nesken pilotari ikusgarritasuna eman eta herri edo auzo bakoitzeko pilotari horiei guztiei erreferentziazko txapelketa eskaintzea, baina puntu honetara iritsita, parte hartze eta ikuslegoaren arrakasta handia izan duen txapelketa bati ginga jartzea geratzen da.

Erabat irekia eta bazteketarik gabe jokatu den txapelketak arrakasta handia izan du eta zenbaitetan frontoietako ateak itxi behar izan dira osasun protokoloak betetzeko. Printzipioz,  ez da arazo hori izango larunbat honetan, beraz, lehiaketa babesten duten erakunde guztiek pilotazaleak pilotalekura joatera animatu dituzte, hori bai, ikuskizun handi honi merezi duen amaiera emateko beharrezkoak diren osasun-arau guztiak zorrotz Beteta (sarrera debaldekoa izango da osasun sailak ezarritako edukiera bete arte). Gainera, Nafarroa Arenara joaterik ez duten pilotazale guztiek ETB-1eko kameretatik jarraitu ahal izango dituzte partidak.

Eta esan beharra dago, asteetako txapelketaren ostean geratu diren finalek merezi dutela, eta asko. Adibidez, eliteen kategorian, ikusmin handia dago horrelako partida batean Laia Salsamendi gaztea nola moldatzen den ikusteko, 14 urterekin txapelketa bikaina egin baitu Etxaurikoak. Uharteko Pelotazale taldean hazitako aurrelariak, bere adinari ez dagokion kalitatea eta tenplea erakutsi ditu, eta Olatz Ruiz de Larramendi izango du alboan, zirkuituko eskuin indartsuenaren jabea.

Nafarrek Amaia Aldai bizkaitarra eta Naroa Agirre gipuzkoarra izango dituzte aurrean, horrelako partidetan eskarmentu handiagoa duten pilotariak, ofiziozko bikotea osatzen dutenak eta berme asko ematen dituztenak, gutxi oparitzen dutenak eta irabazi beharrekoak.

Gazteen finalarekin hasiko da jaialdia, eta etorkizuneko izarrek oinarri gisa egiten ari diren lan handia erakusteko erakusleiho ederra izango da.