MENDI LASTERKETAK

Munduko Mendi Lasterketen Kopa amaitu da, Euskal Selekzioaren partehartzearekin

2021/11/02

Larunbat honetan, Limonen (Italia), Munduko Mendi Lasterketen Kopako hamalaugarren eta azken proba jokatu da, Limone Extreme SkyRace, 27 kilometroko ibilbidea eta 2.600 metroko desnibel positiboa duena.

Euskal Selekzioaren espedizioa 12 korrikalarik osatu zuten, honakoak hain zuzen ere: Mayi Mujika, Ander Iñarra, Xabier Zarranz, Xabier Lete, Iñaki Olano, Lide Urrestarazu, Iñigo Alzola, Andrea Garay, Julen Martinez Estibariz, Aitor Ajuria, Hodei Lujanbio eta Borja Zubizarreta.

Hauek izan dira euskal selekzioaren neska-mutilek izandako emaitzak:

LIMONE EXTREME SKYRACEKO SAILKAPENA

Gizonezkoak

  1. Ander Iñarra
  2. Iñaki Olano
  3. Aitor Ajuria
  4. Julen Martínez de Estibariz
  5. Xabier Lete
  6. Íñigo Alzola
  7. Xabier Zarranz
  8. Borja Zubizarreta
  9. Hodei Lujambio

Emakumezkoak

  1. Mayi Mujika
  2. Lide Urrestarazu
  3. Andrea Garay

World Series mendi lasterketen munduko kopa honetako 14 hitzorduak lehiatu ondoren, Euskal Selekzioak korrikalari bana kokatu du emakumezkoen zein gizonezkoen sailkapen nagusiko bost onenen artean.

Gizonezkoen sailkapenean, Ander Iñarra laugarren sailkatu da Jordi Alisekin postua partekatuta, Limoneko proban lorturiko 18 puntuei, Livigno, Hochkönig eta Gorbeian egindakoak batuta guztira 212 puntu lortu dituelarik. Beraz, Iñarra podiumetik gertu geratu da Christian Mathys suitzarra onena izan den txapelketan. Azpimarragarria da ere Asier Larruzeak lortutako zazpigarren postua 186 punturekin.

Emakumezkoetan ere Mayi Mujika podiumetik oso gertu geratu da, zirkuituko zazpi probatan parte hartu eta gero. Hitzordu puntuagarriak Livigno, Gorbeia, Madeira eta Skyrace des Matheysins izan dira, orotara 256 puntu pilatu dituelarik, hartara bosgarren postua lortuz. Beste euskal federatu batek, Oihana Azkorbebeitiak, hirugarren bukatu du. Emakumezkoetan onena Denisa Dragomir errumaniarra izan da, parte hartu duen 5 lasterketetan gailendu baita. Lide Urrestarazuren merezimenduzko postua ere nabarmendu behar da, 134 punturekin hamahirugarren postuan bukatu baitu.

MUNDUKO KOPAKO SAILKAPENA

Gizonezkoak

  1. Christian Mathys
  2. Daniel Antonioli
  3. Ricardo Cherta
  4. Ander Iñarra
  5. Jordi Alis Sánchez
  6. Luca del Pero
  7. Asier Larruzea

Emakumezkoak

  1. Denisa Dragomir
  2. Stefanie Kröll
  3. Oihana Azkorbeitia
  4. Georgia Tindley
  5. Mayi Mujika
  6. Lide Urrestarazu

Share This