EUSKAL PILOTA
Loitegi eta Goikoetxea nagusi Oriamendi Eskolako txapelketan
![img_8881-1024×683](https://ehkirola.eus/wp-content/uploads/2021/05/img_8881-1024x683-1.jpg)
Loitegi eta Goikoetxeak jantzi dituzte aurten aurreneko aldiz jokatu den afizionatu mailako erremonte txapelketako txapelak, Oriamendiren Pelota Eskolakoak, hain zuzen ere.
Guztira bost bikote aritu dira lehian: Julen Aguerrezabala Matxin VII.a azpeitiarra eta Aitor Aiestaran hernaniarra, Julen Loitegi urnietarra eta Joseba Goikoetxea donostiarra, Ugaitz Susperregi Ibarguren lezoarra eta Iñaki Arizaga Akuxi aizarnazabaldarra, Odei Arregi tolosarra eta Aritz Eskudero andoaindarra eta Jon Irazu adunarra eta Aritz Murgiondo hernaniarra.
Ostiral honetan jokatu da final haundia eta Loitegi eta Goikoetxea bikoteak izan dira Oriamendi erremonte eskolako txapelketaren lehenengo txapeldunak. 40-31 garaitu zituzten Irazu eta Murgiondo finalean eta merezimendu osoz irabazi dute txapelketa. Ligaxkan gertatu bezala Loitegi eta Goikoetxea gehiago izan ziren eta partidua menderatzea lortu zuten.
Hasiera berdindua izan zuen finalak. Lau erremontistak maila paretsuan hasi ziren eta 18nako berdinketara arte ez zegoen argi nork irabaziko zuen txapela. Hala ere, partidu erditik aurrera Loitegik aurrera pausoa eman zuen eta lehenengo abantaila garrantzitsuak lortu zituzten gorriek. 25-20 egin zuten ihes markagailuan eta hortik aurrera kontrolpean eraman zuten partidua. Loitegik tantoak amaitzen zituen aurrean eta Murgiondok ez zuen agintzen atzean. Abantailak gora egin zuen eta azkenean finala 40-31 irabaztea lortu zuten. Murgiondok zortzi tanto egin zituen sakearekin, baina peloteoan Goikoetxea hobeto aritu zen. Aurrean Loitegi izan zen finaleko erremontistarik nabarmenena, baina Irazuk ere partidu ona jokatu zuen.
Final polita ikusi zen eta nahiz eta ikuslerik ez egon etorkizunari begira balorazio ezin hobea egin daiteke txapelketaren inguruan. Txapeldunak bikote onena izan ziren ligaxkan eta nahiz eta finalerdia ez izan beraien partidurik hoberena, finalean berriz ere mailarik onena erakutsi zuten.
Pala Banakakoaren finalerdietako ligaxka hasi da
Ibai Perezek 3-0 irabazi zion Gordoni eta Fustok 3-2 Gaubekari
Malerrekako XIX. pilota txapelketako finalak larunbatean jokatu ziren
Bi pilotalekutan lehiatu dira, kategoria txikienetakoak Lesakan eta nagusienak Donezteben
Abian da Dania Jai Alaiko zesta denboraldia
Otsailetik maiatzaren amaierara arte jokatuko dute, eta uda ostean, berriro ekingo diote jarduerari