Lointek Gernika Bizkaiak Eurokopako final-hamaseirenetara sailkatzeko kanporaketako bueltako norgehiagoka jokatu zuen atzo Turkian. Joanekoan, abenduaren 15an Malosten jokatutako lehian, lortutako 24 punturen aldeari eutsi behar zion Mersinen (Turkia), Cukurovaren aurkako itzulikoan baina azkenean ez zen posible izan. Errenta handia zuten bere alde gernikarrek,  baina 29 puntugatik galdu zuten (69-40) eta agur esan zioten Eurocup Women txapelketari.

Mario Lopezen taldeak zortzi jokalariekin bakarrik ekin zion partidari, Belen Arrojok Turkian bertan egindako probetan positibo eman baitzuen eta ez zuen jokatzerik izan. Gainera, koronabirusaren bilakaeragatik, ia hiru aste zeramatzaten jokatu gabe, eta epaileen erabakietaz aparte, horren eragina ere  sumatu zuten.

Hasieratik ireki zuten zuloa markagailuan turkiarrek, lehen laurdenean 23-6 aurretik zeudelarik. Atsedenaldirako gauzak zailago jarri zitzaizkion Gernikako taldeari, izan ere,  42-15 galtzen heldu ziren, jipoi handia bizkaitarrentzat. Hirugarren laurdenean ere CBK Mersinek agindu zen eta 62-27ko emaitzarekin amaitu zen.

Egia esan, azken laurdenera arte, bizkaitarrak bere mailatik oso urruti aritu ziren, baina hala ere, azken minutuetan berriz ere kanporaketa alde jartzeko zorian izan ziren. 2-13ko partziala egin zuten euskaldunek eta minutu baten faltan kanporaketa berdintzea ere lortu zuten, 64-40koa ipini baitzuten markagailuan. Baina egindako hutsegiteak tarteko, azken minutu horretan 5-0ko partziala erdietsi zuten turkiarrek eta aurrera egin zuten lehiaketan.

Fitxa teknikoa

69.- Cukurova BK Mersin (23+19+20+7): Jasmine Thomas (15), Tiffany Hayes (9), Quanitra Hollingsworth (10), Asena Yalcin (3), Temi Fagbenie (8) -hasierako taldea-; Shavonte Zellous (6), Yvonne Turner (4) eta Kristine Anigwe (14).

40.- Lointek Gernika (6+9+12+13): Roselis Silva (3), Rosó Buch (13), Angela Bjorklund (4), Melisa Brcaninovic (6), Tinara Moore (10) -hasierako taldea-; Itziar Ariztimuño (2), Paula Ginzo (2) eta Marta Alberdi (-).

Partzialak: 23-6, 42-15 (atsedenaldia), 62-27 eta 69-40 (amaiera).

Epaileak: Franko Gracin (Croacia), Kirile Tvauri (Georgia) eta Margarita Petrenko (Rusia).