EUSKAL PILOTA

Jai Alai World Tourreko egutegia aurkeztu dute

2020/07/10

Argazkiak: Jai Alai News

Egun hauetan hasi (uztailaren 10ean, Markina-Xemeinen) eta abendura arte luzatuko du bere aurtengo egutegia Jai Alai World Tour zesta punta zirkuituak

 

Munduko Pilota Batzarrak antolatzen du Jai Alai World Tour zirkuitua eta asteaken honetan aurkeztu dute aurtengo edizioa, Bilboko Ola Martin Berasategui jatetxean. Bingen Zupiria Eusko Jaurlaritzako Kultura eta Hizkuntza Politikako sailburuak, Fernando Azkarate Munduko Pilota Batzarreko presidenteak eta Mikel Egiguren Jai Alive enpresako arduradunak hartu dute parte, besteak beste, zenbait puntista ere bertan zeudela.

Jai Alai World Tour zirkuitua duela sei urte sortu zen eta harrera oso ona izan du hasieratik, horregatik, garrantzitsua zen aurten ere egin ahal izatea, goranzko joera hori bere horretan mantentzeko.

Antolakuntzatik nabarmendu denez, une honetan, kirolaren eta pilotaren alde har daitekeen neurririk onena da normaltasuna pixkanaka berreskuratzea, betiere segurtasun neurriekin zorrotz jokatuz.

Era berean, Munduko Pilota Batzarreko presidenteak Kepa Arroitajauregi zenak egindako ekarpena oroitu eta eskertu nahi izan du bere agerraldian. Arroitajauregi Munduko Pilota Batzarreko zuzendari teknikoa zen, eta maiatzaren 21ean hil zen, 48 urte zituela.

Aurkezpenean azaldutakoaren arabera, oraingoz, zazpi dira ziur jokatuko diren txapelketak: Markina-Xemeingo Mastersa, Lekeitiokoa, Hondarribikoa, Gernikakoa, Donostiakoa, Bartzelonakoa eta Berriatukoa, baina antolatzaileak lanean ari dira Mutriku eta Zumaia ere zerrendara gehitu daitezen.

Txapelketetan egungo puntistarik onenak arituko dira nor baino nor gehiago. Besteak beste, Imanol Lopez, Iñaki Osa Goikoetxea, Diego Beaskoetxea, Aritz Erkiaga, Xabier Barandika, Unai Lekerika, Ibon Aldazabal, Aimar Aldazabal, Hormaetxea, Olha, Olharan,  Etcheto, Zulaika, Minvielle, Arbe, Basque, Salegi, Laduche e.a.

Momentuz, pilotalekuen %60ko edukierarekin jokatuko dira neurketak, eta ikusleek maskara eraman beharko dute derrigorrez.

JAI ALAI WORLD TOURRAREN EGUTEGIA

Momentuz baieztatuta daudenak: Markinako Masters Series Torneoa (uztailak 10, 16 eta 19), Lekeitioko Masters Torneoa (irailak 4 eta 6), Hondarribiko Gran Slam txapelketa (irailaren 18tik urriaren 16ra), Gernikako Gran Slam txapelketa (urriaren 10tik 31ra), Donostiako Masters Txapelketa (azaroan), Bartzelonako Open Torneoa (azaroan) eta Banakakoa Berriatuan (abenduan).

Share This