Itziar Lete Andonegi mutrikuarra izango da aurrerantzean Gipuzkoako Euskal Pilota Federazioko presidentea, Andoni Lertxundiren lekukoa hartuta. Danok Bat Pelotazale Elkarteko kidea, gainera, kargua hartzen duen lehenengo emakumea da.

Itziar Lete ez da edozein pilota munduan. Bere senarrak, Goixerrik (Jon Iñaki Mendizabal), urteak eman zituen Amerikako pilotalekuetan. Itziarrek berak ere sei urte pasatu zituen han. Dituzten bi semeak, Ekaitz eta Aratz, zesta-puntako profesionalak dira, Estatu Batuetako Danian eta Miamiko pilotalekuetan. Hori guztia gutxi balitz bezala, Itziar Letek zortzi urte darama Gipuzkoako Federazioaren zuzendaritzan.

Abenduaren 10ean bukatu zen Zuzendaritza Batzorderako hautagaitzak aurkezteko epea. Hautagai zerrenda bakarra aurkeztu zen, Itziar Lete Andonegi buru zuena. Hautagaitza hori behin-behinean aldarrikatu eta erreklamazioetarako epea zabaldu zuen GEPFko Hauteskunde Batzordeak, abenduaren 15era bitartean. Hala, hautagaitza bakarra egonik hauteskundeak egin beharrik ez dagoenez, eta aurkako erreklamaziorik aurkeztu ez denez, zerrenda behin betiko aldarrikatu du orain Hauteskunde Batzordeak. Eta horrela bukatutzat eman da federazioaren hauteskunde prozesua.

Aurreko legegintzaldian presidenteordea izan da Lete, eta presidente kargua hartu du orain. Zortzi laguneko taldea izango du bidelagun legegintzaldi berri honetan, besteak beste, orain arteko presidentea Andoni Lertxundi Arratibel, oraingoan presidenteorde karguan. Iñaki Lizaso Perezek, Nekane Astigarraga Letek eta Orkatz Argote Erkiziak ere jarraituko dute zuzendaritza taldean. Iker Epelde Agirre, Javier Iraola Calvo, Itziar Lopetegi Rekalde eta Josu Osa Zubia dira kide berriak.

Hauxe da, hain zuzen ere, Gipuzkoako Euskal Pilota Federazioaren Zuzendaritza Batzorde berria:

Itziar Lete Andonegi, Presidentea

Andoni Lertxundi Arratibel, Presidenteordea

Iñaki Lizaso Perez, Diruzaina

Nekane Astigarraga Lete, Idazkaria

Orkatz Argote Erkizia, Bokala

Iker Epelde Agirre, Bokala

Javier Iraola Calvo, Bokala

Itziar Lopetegi Rekalde, Bokala

Josu Osa Zubia, Bokala