Elite mailako eskuz binakako lehia final-zortzirenekin hasiko da eta finala urtarrilaren 2an izango da, bertan pilotari onenetarikoak arituko direlarik lehian.

Bi urteko etenaldiaren ondoren, afizionatu mailako gizonezkoen pilota partidez gozatzeko aukera izango da beste behin Villabonako Bearzana frontoian, izan ere, ostegun honetan emango zaio hasiera IX. Antton Pebet Oroimenezko txapelketari. Binaka jokatuko dute eta guztira hamabi bikotek hartuko dute parte txapelketan.

Esan bezala, lehen jardunaldia  abenduaren 2an lehiatuko da, non bi partida izango diren jokoan. Lehenengoan Murua-Aizpuru eta Etxezarreta-Aranguren lehiatuko dira, eta bigarrengoan Exposito-Elizegi eta Azketa-Altuzarra. Ostiralean, abenduak 3, beste bi partida izango dira: Xabier Urbieta-Alduntzin eta Igoa-Arbizu bikoak arituko dira lehenengoan, eta Eneko Labaka-Etxeberria eta Mata-Lizeaga bigarrengoan.

Irabazleek aurrera egingo dute, eta euren zain egon dira beste lau bikote final-laurdenetan, abenduaren 10ean eta 11n jokatuko direnak. Abenduak 2ko lehen partidako irabazleek Landa-Urruzola izango dituzte zain, eta bigarren partidako irabazleek Elola-Aldave. Abenduak 3ko lehen partidako irabazleek Alberdi-Garmendia bikoaren aurka jokatu beharko dute, eta bigarren partidako irabazleen aurkariak Espinal-Balerdi izango dira.

Finalerdiak abenduaren 17an, ostiralez, jokatuko dituzte, eta finala urtarrilaren 2an, igandean, izango da.

2022an 75 urteko beteko dituen Behar Zana elkartea da txapelketaren antolatzailea, lehiaketaren sorreraren oinarrian egon ziren helburuei tinko eusten diolarik: Antton Pebet Behar Zanako pilotari ohia gogoan izatea eta pilota sustatzea. Batez ere, oinarrian lan egiteari eman diote garrantzia elkarteko kideek, txikitatik neskak eta mutilak modalitate ezberdinetan pilotan aritzea sustatuz.