HERRI KIROLAK

Bizkaiko Lokotx Biltze Txapelketa jokatu zen Gautegiz-Arteagan

by | 2021/09/07

Argazkiak: egursport.com

Aritz Martinek eta Valentina Rangelek irabazi dute Bizkaiko Lokotx Biltze Txapelketa

 

Gautegiz Arteagan jokatu zuten pasa den igandean, irailak 5, Bizkaiko Lokotx Biltze Txapelketa, non 5 emakume eta 9 gizon aritu ziren nor baino nor gehiago txapela eskuratzeko lehia bizian, azkenean Aritz Martin gernikarra eta Valentina Rangel getxoztarra nagusitu zirelarik.

Emakumezkoetan zein gizonezkoetan alde estua egon zen lehenengo bien artean. Sei minutu eta 32 ehunenetan amaitu zituen lanak Martinek eta hamalau segundo gehiago behar izan zituen Patrik Saitua gautegiz arteagarrak. Atzetik Ibai Sanz eta Oier Ibergallartu sailkatu ziren zazpi minutu eta hemeretzi segundoko denborarekin, milarenengatik erabaki zirelarik hirugarren eta laugarren postuak.

Emakumezkoetan berriz, bi segundoko aldea egon zen lehenengo bien artean. Zortzi minutu eta hamabi segundoko marka egin zuen Valentina Rangel txapeldunak, eta Irantzu Onaindia gernikarra geratu zen txapeldunorde. Iraide Gezuraga arratzuarrak osatu zuen podiuma, bederatzi minutu eta 52 segundoko denbora eginda.

Bizkaiko txapelketaz gain, Gautegiz Arteagako frontoian batu zirenentzat aizkora eta harri jasotze saioak eskaini zituzten. Aizkoran, Atutxa II eta Gisasola IVak eman zuten erakustaldia, eta Gisasola Va aritu zen harriak jasotzen.

SAILKAPENAK

Emakumezkoak:

1 Valentina Rangel  8 minutu eta 12 segundo

2 Irantzu Onaindia  8 minutu eta 14 segundo

3 Iraide Gezuraga   9 minutu eta 52 segundo

4 Amaia Mendinueta   10 minutu eta 4 segundo

5 Aiora Otazua  10 minutu eta 42 segundo

Gizonezkoak:

1 Aritz Martin  6 minutu eta 32 segundo

2 Patrik Saitua  6 minutu eta 46 segundo

3 Ibai Sanz  7 minutu eta 19,31 segundo

4 Oier Ibergallartu  7 minutu eta 19,51 segundo

5 Kyler Rimmer  7 minutu eta 30 segundo

6 Xabier Rodriguez  7 minutu eta 34 segundo

7 Jon Tobarra  7 minutu eta 36 segundo

8 Xabat Erleaga  7 minutu eta 50 segundo

9 Beñat Obieta  7 minutu eta 51 segundo

Share This