Asteburu honetan jokatu da Bizkaia Pala Torneoaren seigarren jardunaldia baina saio bakoitzeko partida bakarra jokatu ahal izan da, COVID19 gaitzari aurre egiteko ezarritako konfinamenduak aurreikusita zeuden norgehiagokei eragin baitie.

Aurreneko ekitaldia pasa den ostiralean, apirilak 30, lehiatu zen Bizkaia Frontoian, arratsaldeko 18:30etan hasita, bertan honako lehia izan zelarik: Maldonado eta Ibai Perez Fusto Del Rioren aurka.

Partida honetan maila bikainean aritu ziren urdinez jantzitako Fusto eta Del Rio eta garaipen erosoa lortu zuten Maldonado-Ibai Perez bikote gorriari 3-0 irabazita (3-10, 8-10,8-10), hartara lidergoa ere eskuratu zutelarik.

56 minutu iraun zituen norgehiagokak eta hasieratik urdinak nagusitu ziren, lehenengo jokoa erraz irabazi zutelarik. Handik aurrerako bi jokoetan ere hobeagoak izan ziren eta beraz sailkapeneko aurreneko lekura eraman dien garaipena lortu zuten. Aurrelari argentinarren arteko lehian Fusto nagusitu zen eta Maldonadok aldiz ez zuen bere mailarik onena erakutsi.

Larunbatean, maiatzak 1, Larrabetzun, jokatu zen jardunaldiko bigarren partidua, arratsaldeko 18:00etan hasita, Fusto-Del Rio eta Ibarguren-Urrutia bikoteen artean.

Ostiralean ez bezala, honakoan Fusto eta Del Rio ez ziren fin aritu eta orainarte txapelketan zorterik gabe ibilitako Ibarguren eta Urrutiak erakutsitako joko onari probetxua atera zioten behingoz, 3-0 irabazi zutelarik (6-10, 6-10,6-10). Lazkaoko aurrelariaren abiadura eta Armintzako atzelariaren sendotasuna izan ziren garaipenaren ardatzak. Fusto eta Del Rio lidergoan mantentzen dira oraindik porrot honen ostean baina ondo baino hobeto jabetu ziren aurkari potenteak izango dituztela aurrean txapelketa irabazteko nahian.

Asteburuko emaitzak:

Apirilaren 30ean, 18:30, Bizkaia frontoia

Maldonado-Ibai Perez 0 Fusto-Del Rio 3

Maiatzaren 1ean, 18:00, Larrabetzu

Fusto-Del Rio 0 Ibarguren-Urrutia 3

SAILKAPENA:

Fusto-Del Rio, jokatutako partidak 6, irabazitako jokoak  14, galdutako jokoak 8: 14 puntu

Maldonado-Ibai Perez, jokatutako partidak 5, irabazitako jokoak  12, galdutako jokoak 5: 12 puntu

Gaubeka-Gordon, jokatutako partidak 5, irabazitako jokoak  11, galdutako jokoak 10: 11 puntu

Necol-Cambos, jokatutako partidak 4, irabazitako jokoak  8, galdutako jokoak 8: 8 puntu

Ibarguren-Urrutia, jokatutako partidak 5, irabazitako jokoak  6, galdutako jokoak 12: 6 puntu

Garate-Ibargaray jokatutako partidak 3, irabazitako jokoak  1, galdutako jokoak 9: 1 puntu

Hurrengo jardunaldiak:

Maiatzaren 8an,17:00, Bizkaia frontoia

Necol-Cambos vs. Garate-Ibargaray

Maldonado-Ibai Perez vs. Gaubeka-Gordon

Maiatzaren 15ean, 17:00, Bizkaia Frontoia

Maldonado-Ibai Perez vs. Garate-Ibargaray

Fusto-Del Rio vs. Necol-Cambos

Bizkaia Torneoa

3 fase izango ditu txapelketak:

a) Sailkapen Liga: Guztiak guztien aurka joan-etorrian.
b) Finalerdiak: 1. bikote sailkatua sailkapen Ligan 4. bikotearen kontra eta 2. sailkatua 3. sailkatuaren kontra.
d) Finala: Bi finalerdietako irabazleak nor baino nor.

Partida guztiak 5 jokorik onenean jokatuko dira. Bikote bakoitzak lortzen dituen joku adina puntu lortuko ditu. Jokuak 10 tantora izango dira (azken txapelketetan ohikoa izaten ari den eran partidak Bizkaia Frontoiaren Facebook-eko orriaren bidez emango dira).

Guztira 13 jardunaldi izango dira eta hasierako ligaxka amaitzen denean, ekainaren 12an finarlerdiak lehiatuko dira, finalaren txanda astebete beranduago izango delarik.