Santikutz Klasika bertan behera uztea erabaki dutela jakinarazi du Telleriarteko Txirrindulari Elkarteko zuzendaritzak argitara emandako agiri baten bidez.

Urtero maiatzeko lehenengo egunean Santikutz klasika antolatzen du Telleriarteko Txirrindulari elkarteak, aurtengoa lasterketaren LXXXVII. edizioa izan behar zuelarik.

Dagoeneko atzeratua izan zen bere momentuan, Covid19 gaitzak eragindako egoeraren ondorioz, eta printzipioz irailaren 27an jokatzekoa bazen ere egoeraren okertzeak antolakuntzaren planak zapuztu ditu berriro ere.

Antolakuntzak dioenez, bueltan dugu iraila eta osasun-egoerak ez du nabarmen hobera egin, beraz, ezin da bermatu txirrindulari lasterketa normaltasunez egin ahal izatea.

Horregatik, Telleriarte Txirrindulari elkarteak lehentasuna eman dio guztion osasun eta ongizateari eta aurtengo edizioa bertan behera uztea erabaki du.

Hain zuzen ere, edizio hau mimo bereziarekin prestatzen ari zirela komentatu dute, asmoa zelarik ibilbidean aldaketak eginez ikusgarritasun handiagoa ematea lasterketari.

Dena den, hartutako erabakia zaila dela jakinda ere, antolakuntza lanetan bete beharreko neurriak ezartzeko zailtasunak eta haien kontroletik kanpo dauden arriskuak gain hartu ezin izanak, hartutako erabakia zentzuzkoena izatea eragin dute.

Azkenik, eskerrak eman nahi izan dizkiete babesleei eta laguntzaileei, eta datorren urtean indartuta itzuliko direla hitz eman dute.

Santikutz Klasika Legazpi inguruetatik lehiatzen den lasterketa da. 1929. urtean izan zen lehenengo edizioa eta 1964. urterarte profesionalek ere parte hartu zezaketen.

Lasterketa birtuala

Maiatzaren lehenean, lasterketa birtuala antolatu zuten Bkool plataformaren bitartez, non amateur kategoriako talde onenetan aritzen diren ehun txirrindularik parte hartu zuten.

30 kilometrotako ibilbidea zuen probak, Lierniako jeitsiera eta Gabiria eta Aztiriako igoerak tartean, helmuga jakina Legazpin zegoelarik.