MENDI LASTERKETAK

Aurten ere ez da Leharrei mendi lasterketa egingo

by | 2021/02/10

Koronabirusaren pandemiak eraginda, 2020. urtean ez zen Leharrei Mendi Lasterketa jokatzerik izan. Eta antolatzaileek jakinarazi berri dutenez, 2021ean ere ez da jokatuko.

Antolatzaileek emandako azalpenean agertzen denez, koronabirusaren ondorioz ezarritako neurri murriztaileekin ezinezkoa zaie lasterketaren parte hartzaileek eta herritarrek gozatzeko moduan antolatu.

Dagoeneko beraz datorren urteari begira jarri dira, 2022ko edizioa betiko eran antolatzeko modua izateko esperantza agertu dutelarik.

Jada martxoaren erdialdera, apirilaren 4an aurreikusita zegoen Leharrei Mendi Lasterketa atzeratzea erabaki zuen Leharrei Antolakuntza Taldeak, pandemiaren bilakaera ikusita.

Orduan, pandemiaren egoera aztertuz, antolakuntza lanean jarri zen beste egun batean egin ahal izateko baina aste batzuk geroago antolakuntzak lasterketa guztiz bertan behera uztea erabaki zuen, hau da, hurrengo edizioa 2021ean egiteko asmoarekin. Baina tamalez, orain jakin dugunez, aurten ere ezingo da lasterketa egin eta 2022ra atzeratu da hitzordua.

Leharrei Mendi Lasterketa

Leharrei Mendi Lasterketa Gabiria zeharkatzen duen lasterketa bat da. 24km-ko luzera eta 1300m-ko desnibela duen ibilbidea da. Lasterketaren irteera eta helmuga Gabiriako herrigunean izaten dira.

Lasterketa hau antolatzeko ideia garai bateko herri­bide zaharrak berreskuratzen hasi zirenean sortu zen. Hainbat auzolanen ondoren, herri bide sare bat garbitu zen eta konturatu ziren merezi zuela garbi mantentzeko egindako lan haiei jarraipena ematea.

Handik aurrera, lasterketa hau aitzakia bezala baliatzen dute urtero herri­bide zirkuitu hau garbitzeko. Era berean, ibilbidea markatuta egoten da urte guztian zehar, herritarrek eta ingurukoek herriko txoko ezberdinak ezagutu ditzaten eta, herritik irten gabe, mendi­ ibilaldi polit bat egin ahal izateko lehengoek erabiltzen zituzten bideetan barrena.

Mandoak igo ezin izan zuena, lasterketan

Berezitasun gisa, aipatzekoa da lasterketa honen azken zatia aldapa gora izango dela. Diotenez, eliza eraikitzen ari zirela, harria garraiatzen zebilen mando bat leher eginda bertan geratu zen; hortik datorkio azken aldapa honi bere izena, eta, ondorioz, lasterketari.