HERRI KIROLAK/AIZKORA
Abenduaren 13ra atzeratu dute Sherpa.ai Aizkolari Txapelketa Nagusiko finala
![img_4928-1200×800-1](https://ehkirola.eus/wp-content/uploads/2020/11/img_4928-1200x800-1.jpg)
Sherpa.ai Aizkolari Txapelketa Nagusiko final haundia azaroaren 29an jokatzekoa zen, baina indarrean dagoen konfinamendu perimetrala dela eta, hitzordua atzeratzea erabaki dute antolatzaileek.
Antolakuntzak zabaldutako oharrean jasotzen denez, txapelketaren helburuetako bat zaleak eta ikusleak erakartzea da, eta ondorioz, atzerapenaren alde egin dute, data berrian zaleak Bilbao Arenako harmailetan egon daitezen finalaz gozatu ahal izateko, gaur-gaurkoz, ezingo lukete eta inguruko herrietako ikusleek bertaratu.
Hori dela eta, abenduaren 13ra –igandea– atzeratu dute finala eta aurreikusita zegoen bezalaxe, Bilboko Arenan jokatuko da, eguerdiko 12:00etan hasita.
Aizkolaritza modernizatzeko eta profesionalizatzeko asmoz Euskal Herriko Herri Kirolen Federaziotik aparte aizkolariek beraiek sustatutako txapelketa da Sherpa.ai. Aizkolarien eta Federazioaren artean zeuden desadostasunak tarteko hartu zuten txapelketa kirolariek beraiek antolatzeko erabakia.
Pasa den urriaren 24an, txapelketako finalerdia lehiatu zen Zestoan, non guztira hamar aizkolarik parte hartu zuten: Mikel Larrañaga , Eneko Otaño, Ruben Saralegi, Jon Rekondo, Julen Alberdi Txikia IV.a, Iker Vicente, Jexux Mujika, Jon Irazu, Ugaitz Mugertza eta Aitzol Atutxa.
Eguneko denborarik onenak eginda, final handira sailkatu ziren Mikel Larrañaga, Iker Vicente, Eneko Otaño, Julen Alberdi, Aitzol Atutxa eta Jon Irazu. Sei aizkolari hauek beraz, izango dira abenduaren 13ko finalean, bertan egin beharreko lana honakoa izango delarik: lau kanaerdiko (54 ontza), lau oinbiko (72 ontza) eta 60 ontzako beste lau enbor. Hauek mozten azkarrena den aizkolariak jantziko du aizkolaritzako kategoria nagusiko txapela.
Abenduaren 13an, Bigarren mailako finala ere lehiatuko da eta bide batez lehenengo mailara igotzeko promozioa, honako aizkolariak arituko direlarik: Larrea III.a, Corchero, Jauregi, Aratz Mugertza, Eneko Saralegi, Pellejero, Zelai IV.a eta Julen Kañamares.
Laxoa txapelketako bi jardunaldi jokatu dituzte asteburuan
7. eta 8. jardunaldiko partidak lehiatu zituzten, ostegunetik hasita igandera bitartean
Urrezko aizkolari zein harrijasotzaileen finalak jokatu dira Azpeitian
Arrutik eta Alberdik, aizkoran, eta Gisasolak eta Eizmendik, harria jasotzen, jantzi dute txapela
640 kiloko Euskadiko Sokatira txapelketako bigarren jardunaldia lehiatu da
Gaztedi A taldea nagusitu zen berriro eta horrek sailkapen orokorreko lehen postuan jarraitzea ahalbidetu zion