HERRI KIROLAK/AIZKORA/HARRIA

Urrezko Banakako Aizkolari Txapelketako kanporaketa jokatu dute Leaburun

by | 2021/05/17

Argazkiak: egursport.com

Urrezko Banakako Aizkolari Txapelketako laugarren kanporaketa jokatu zuten iragan larunbatean Leaburu-Txaramako industrialdeko Diva Pentsuak-en, bertan Xuban Kañamares V.a, Joxean Etxeberria eta Patxi Mindegia hurrengo faserako sailkatu zirelarik.

Bertan, honako aizkolariak aritu ziren lehian: David Naredo, Joxean Etxeberria, Luis Txapartegi, Xuban Kañamares V.a, Iban Resano, Manuel Fraile, Patxi Mindegia, Jokin Urretabizkaia “Basozabal” eta Emilio Garcia.

Aizkolari bakoitzak bina enbor moztu behar izan zituen, hiru txandatan aritu zirelarik, hiruna aizkolari. Aurreneko fase honetan, lehen txandan David Naredo (4´08´´), Xuban Kañamares V.a (4´05´´) eta Iban Resano (4´24´´) aritu ziren. Bigarren txandan, Joxean Etxeberria (4´04´´), Luis Txapartegi (4´06´´) eta  Jokin Urretabizkaia “Basozabal” (4´25´´) aritu ziren. Eta hirugarren txandan berriz, Manuel Fraile (6´34´´), Patxi Mindegia (3´50´´) eta Emilio Garcia (6´39´´).

Denbora hoberena lortu zuten sei aizkolariek bigarren fase bat jokatu zuten. Hiru txanda izan ziren hor ere, eta bina aizkolari aritu ziren txanda bakoitzean. Xuban Kañamares (4´18´´) Luis Txapartegiren aurka (4´35´´), Patxi Mindegia (3´45´´) David Naredoren aurka (4´28´´), eta Joxean Etxeberria (4´41´´) Manuel Fraileren aurka (6´40´´).

Azkenean beraz, hurrengo faserako txartela lortu zuten aizkolariak, Xuban Kañamares V.a, Joxean Etxeberria eta Patxi Mindegia izan ziren.  

Halaber, Urdax Magunazelaiak hiru hamarreko harri jasotzaile txapelketako hirugarren kanporaketa izan zuen, guztira 50 altxaldi gauzatu zituelarik: 125 kiloko zilindroarekin 22 jasoaldi egin zituen, eta hamalauna jasoaldi 125 kiloko kubikoarekin eta bolarekin.

Emakumezkoen harri jasotzaile txapelketan berriz, Udane Ostolaza aritu zen. 50 kiloko zilindroarekin 16 jasoaldi egin zituen, 53 kiloko kubikoarekin 9 jasoaldi, eta 50 kiloko bola 12 aldiz altxa zuen.

Share This