ARRAUNA

Santurtzi eta Deustu, Bizkaiko txapeldun

by | 2021/07/15

Santurtzi izan da Bizkaiko txapelduna gizonezkoen mailan eta Deustuk lortu du garaipena emakumezkoen mailan. Kale beretik arituta irabazi zuten biek; ‘Tomatera’-ren lehendabizikoa da eta ‘Sotera’-rena, berriz, hamaikagarrena.

Emakumezkoetan lau talderen artean erabaki zen txapelduna: Isuntza, Ondarroa, Deusto eta Lutxana. Iazko txapelduna Ondarroa izanik ere, Tomatera ontzia zen bandera irabazteko faboritoa eta deustuarrek ez zuten hutsik egin Lekeitioko estropada eremuan. Hasieratik hartu zuten estropada burua, baina ez ziren urrun Ondarroa eta Isuntza. Lutxana aldiz, berehala geratu zen atzean. Deustu heldu zen aurrena lehen ziabogara, sei segundo geroago Ondarroa, eta hamaika segundora Isuntza. Azkenean, posizioak mantendu zituzten, eta helmugan Deustuk lau segundoren aldea atera zion Ondarroari, hamairukoa Isuntzari eta dexente atzerago ailegatu zen Lutxana, 55 segundora.

Gizonezkoetan, berriz, hamar talde aritu ziren hiru txandatan banatuta eta are estuagoa izan zen lehia. Lehen paladatik Santurtzik eta Zierbenak egin zuten aurrera, eta lehen ziabogara berdinduta ailegatu ziren, zazpi segundo geroago heldu zirelarik Urdaibai eta Ondarroa.

Azken ziabogara hiru segundoren aldearekin heldu ziren moreak baina amaierako zatian Sotera ontziak hegan egin zuen sasoi betean daudela erakutsita (Eusko Label ligako lidergoan daude) eta azkenean Santurtzi izan zen garaile, eta Zierbena bigarren, hamabost segundora. Ondarroa sailkatu zen hirugarren 34 segundora, eta Urdaibai laugarren 44 segundora.

SAILKAPENAK

Gizonezkoak

  1. Santurtzi 20:53,93
  2. Zierbena 14,91″ra
  3. Ondarroa 34,06″ra
  4. Urdaibai 44,38″ra
  5. Arkote 56,18″ra
  6. Lekittarra 58,23″ra
  7. Deusto 1:31ra
  8. Kaiku 1:43ra
  9. Portugalete 2:08ra
  10. Busturialdea 2:56ra

Emakumezkoak

  1. Deusto 12:11,31
  2. Ondarroa 4,18″ra
  3. Isuntza 13,59″ra
  4. Lutxana 55,92″ra
KAE eta ETE ligak, uztailaren 11n

KAE eta ETE ligak, uztailaren 11n

Data horretan hasiko da lehia hiru ligetan, Pasaian, eta abuztuaren 30ean amaiera emango zaio Castro Urdialesen egingo den estropadarekin