TXIRRINDULARITZA

Primoz Roglicek jantzi du Euskal Herriko Itzuliaren lehen elastiko horia

by | 2022/04/04

Argazkiak: Itzulia.eus

Euskal Herriko Itzuliaren estreinako etapa lehiatu zen astelehen honetan, apirilak 4, non azken urteotan lasterketak hartu duen bideari eutsiz, bakarkako saioa izan zuten ziklistek Hondarribian, 7,5 kilometroko erlojupekoan.

Aldapatxoak, harbidea eta kale estuak aurkitu zituzten herriko  alde zaharrean barna eta horrez gain, lehendabiziko igoera puntuagarria izan zuten ibilbidearen erdialdera, 3. mailako gaintxo bat. Kilometro eta erdiko luzera duen igoera horretako hasierako 500 metroetan, batez beste, % 9ko maldak gainditu behar izan zituztelarik.

Txapela lortzeko hautagai nagusiak amaieran abiatu ziren, eta ez zuten huts egin, horien artean azkarrena Primoz Roglic (Jumbo Visma) izan zelarik, sekulako erakustaldia emanda 2022ko Euskal Herriko Itzuliko lehen lidertza eskuratu zuelarik.

Esloveniarrak 9 minutu eta 48 segundo behar izan zituen Hondarribian hasiera eta amaiera izan duen erlojupekoaren ibilbidea betetzeko. Atzetik, bigarren postuan bost segundora sailkatu zen Remco Evenepoeli (Quick Step – Alpha Vinyl). Remi Cavagna (Quick Step – Alpha Vinyl) izan zen hirugarren, 16 segundora.

Geraint Thomas eta Adam Yates Ineos Grenadiers taldeko txirrindulariak Roglicekiko 18 segundora helmugaratu ziren, baita Aleksandr Vlasov (BORA hansgrohe) ere.

Euskal txirrindulari onena Ion Izagirre (Cofidis) izan zen, zortzigarren postuan amaituta, Roglicek baino 20 segundo gehiago behar izan zituelarik ibilbidea osatzeko. Gorka Izagirrek (Movistar) 12. bukatu zuen, 24 segundora. Pello Bilbaok (Bahrain Victorious) aldiz, ez zuen saio ona egin eta 29 segundo galdu zituen irabazlearekiko.

SAILKAPENA

1 ROGLIC, Primoz    TJV    005:14:23

2 EVENEPOEL, Remco    QST    +00:00:05

3 CAVAGNA, Rémi    QST     +00:00:16

4 THOMAS, Geraint    IGD     +00:00:18

5 YATES, Adam     IGD     +00:00:18

6 VLASOV, Aleksandr    BOH      +00:00:18

7 ARMIRAIL, Bruno     GFC      +00:00:20

8 IZAGUIRRE INSAUSTI, Ion     COF     +00:00:20

9 VINGEGAARD, Jonas    TJV      +00:00:20

10 TULETT, Ben    IGD       +00:00:21

TXIRRINDULARITZA

Share This