MENDI LASTERKETAK
Otsailaren 1ean irekiko dute Euskal Herria Mendi Erronkan izena emateko epea
Ekainaren 5ean egitekoa zen iaz Leitzako mendi lasterketa, baina pandemiaren bilakaera desegokia zela eta bertan behera uztea erabaki zuten. Egoera gogorra bezain xelebrea pairatzen ari gara azken hilabete luzeotan, eta horrek ondorio zuzena izan zuen ofizialtasuna, euskara eta auzolana bezalako balioak aldarrikatzeko erabiltzen duten lasterketa ezagunean.
Urte baten bueltan baina, antolatzaileek aurtengo lasterketa egiteko ahaleginarekin jarraitzen dute, eta hartara otsailaren 1ean, 10:00etan irekiko dute izen ematea eta zabalik egongo da apirilaren 4ra bitartean.
Parte hartzaileek bi modalitate izango dituzte aukeran, bakarka eta erreleboka: bakarkako 700 dortsal izango dira eskuragarri, eta errelebokako lasterketarako bikotekako 50 dortsal.
Errelebokako modalitatea aukeratzen dutenen kasuan, gutxienez, bikotea osatzen duen bat emakumea izan beharko da, hau da, emakume-emakume edo emakume-gizonezko bikoteak osatu ahal izango dira. Ez da onartuko inolaz ere gizonezko-gizonezko konbinaketa. Erronkaren lehen zatia bikoteko partaide batek egingo du eta bigarren erdia beste partaideak.
Euskal Herria Mendi Erronka (EHME) kirol ekitaldi hutsaz gain, aldarrikapena ere oinarrian daraman lasterketa da, izan ere, mendi lasterketa eta euskal mendizaletasuna sustatzeaz gain, euskal selekzioen ofizialtasuna, Mendialdea-Aralarko inguruaren garapena (Araitz-Betelu, Larraun-Lekunberri eta Leitzaldea), euskararen sustapena, lurraldetasuna edo ingurugiroaren babesean eragitea ere hasieratik ezarritako “erronkak” bihurtu ziren.
EH Mendi erronkaren errekorrak:
67km gizon: Daniel Agirre (2015) > 6:42:59
67km emakume: Oihana Kortazar (2016) > 7:55:02
KB gizon: Iker Karrera (2015) > 0:43:25
KB emakume: Izaskun Zubizarreta (2015) > 0:49:49
Erreleboetako lasterketa (2019): Garazi Artola eta Ibai Madina > 7:10:26
Bertan behera utzi dute Azkoitiko XVI. Herri Lasterketa
Osasun krisiak bultzatuta guztien ongizatearen alde egiteko hautua egin du probaren antolakuntzak
2021eko mendiko lasterketen rankinga, bertan behera
Edonola ere, Euskal Mendi Federazioak lineako, bertikaleko eta ultra distantziako txapelketak aurrera ateratzen saiatuko da
Larunbatean jokatzekoa zen Adunako Mendi Duatloia ez da egingo
Aurretik Amasako Mendi Duatloia ere geratu zen bertan behera, Eusko Jaurlaritzak hartutako neurriengatik