HERRI KIROLAK/AIZKORA/INGUDEA
Nafarroako ingude eta aizkora txapelketak larunbatean Beran
![Larretxea-Goia](https://ehkirola.eus/wp-content/uploads/2020/08/Larretxea-Goia.jpg)
Nafarroako ingude altxatze txapelketak eta III. mailako aizkora txapelketako finala larunbatean jokatuko dira Berako pilotalekuan, arratsaldeko 17:00tan hasita.
Nafarroako Kirol Federazioak antolatuta, kirol hitzordu hirukoitza izango da beraz, larunbat honetan Beran. Alde batetik, Nafarroako III. Mailako Aizkora Txapelketako finala jokatuko dute eta bestetik, gizonezkoen eta emakumezkoen ingude altxatze txapelketak egingo dituzte.
Nafarroako III. Mailako Aizkora Txapelketako finalean hiru aizkolari arituko dira nor baino nor gehiago: Ibai Soroa (Arribe) eta Oier Larretxea eta Endika Goia beratarrak.
Egin beharreko lana honakoa: 45 ontzako bi enbor eta beste bi kanaerdiko moztu beharko dituzte eta azkarrenak izaten diren lehen bi aizkolariak mailaz igoko dira.
Nafarroako Ingude Txapelketak ere lehiatuko dira larunbatean, gizonezkoen zein emakumezkoen kategorian. Gizonezkoak 18 kiloko ingudearekin arituko dira eta emakumezkoak 9 kilokoarekin.
Nafarroako Emakumezkoen Ingude Altxatze Txapelketan bost lagunek eman dute izena: Maika Ariztegi (Ituren), Virginia Finol (Iruñea), Irune Biurrun (Antsoain), Nerea Resa (Antsoain) eta Jenny Serrano (Iruñea). Bederatzi kiloko ingudearekin minutu eta erdiz ahalik eta altxaldi gehien eman beharko dituzte.
Gizonezkoetan, berriz, beste bost parte-hartzaile izango dira: Josetxo Urrutia (Leitza), Alex Fernandez (Iruñea), Imanol Martin (Berriozar), Angel Albarran (Guadalajara) eta Iosu Marturet (Antsoain). Kasu honetan, 18 kiloko ingudearekin minutu eta erdiko tartea izango dute ahalik eta altxaldi gehien egiteko.
Txapelketa hauetaz aparte, Eztegara pilotalekuan 17:00etan hasiko den herri kirol jaialdian, Nerea Sorondo (Bera) eta Itxaso Onsaloren (Areso) aizkora erakustaldia ere egongo da, hartara egun polita borobiltzeko aukera izango dutelarik herri kirol grinaz berataratzen diren zale guztiek.
Nafarroako ingude eta hirugarren mailako aizkora txapelketak jokatu dira
Ingudean Maika Ariztegi eta Iosu Marturet nagusitu dira eta aizkoran Iker Gorriti izan da txapelduna
Sokatira Mundiala. Sokatira Euskal Herrian
Sokatira gure herriari hertsiki lotua dagoen kirol jarduera da
Euskal Pentatloiaren bigarren kanporaketa jokatu da
Izeta VI.a, Joseba Otaegi, Errazkin, Irazabal, Gabirondo eta Peñagarikano, finalera