Larunbatetako jaialdiak itzuliko dira Galarretara eta astelehenetako Sagardoaren Txapelketako hitzorduak ordu bete aurreratuko dira aste honetatik aurrera 

Erremonte jaialdiak larunbatero itzuliko dira Galarretan, aste honetatik aurrera. 16:30etan hasiko dira jaialdiak eta hiru partidu iragarriko dituzte larunbatero, Oriamendi enpresako arduradunek azaldutakoaren arabera. Larunbatetako itzulera honetan, lehenengo jaialdian, estelar interesgarria lehiatuko da.

Ansa II.a eta Larrañagak, Ezkurra II.a eta Juanenearen aurka jokatuko dute. Gipuzkoarren eta nafarren arteko derbia izango da eta hasiera batean behintzat oso parekatua izatea espero da. Estelarra 40 tantora jokatuko da eta lehendabiziko partidua eta hirugarrena 35 tantora.

Lehendabiziko norgehiagokan Etxarri eta Odeik, Urrutia II.a eta Martirenaren kontra arituko dira eta jaialdia Goikoetxea V-Apezetxea vs. Loitegi-Labaka partiduak itxiko du. Apezetxea goizuetarra berriz ere kantxa gainean ikusteko irrikitan daude zaleak eta ikusmin haundia piztu da. Berria txapelketan estreinatu zen eta partidu guztiak irabazi zituen, oraindik ez duelarik porrotik jaso profesionalen mailan.

Sagardoaren Txapelketa, 18:00etara aurreratu da

Dena dela, astelehenero lehiatzen den Sagardoaren Txapelketak jarraituko du, ekainera luzatuta, Erremontari saioaren barruan. Partiduak 22:30etan eskaintzen diren arren ETB1en, partiduak arratsaldean zehar jokatzen dira Galarretan. Hernaniarrak gonbidatuak daude jaialdira eta ordu aldaketa izango da asteleheneko jaialdian. Orain arte 19:00etan hasten zen, eta astelehenetik ordubete aurreratu eta 18:00etan hasiko da txapelketako lehenengo partidua eta jarraian jokatuko da, 19:15ak aldera, bigarrena.

Oraindik ez dira iragarri hirugarren jardunaldiko bi partiduak, baina bigarren partiduak jokatuko dituzte bikote gehienek. Hirugarren partidua jokatuko duenik ere egongo da.