HERRI KIROLAK/HARRIA

Jokin Eizmendik irabazi du aurtengo Igeldoko Harria Txapelketa

by | 2020/08/10

Argazkiak: egursport.com

Larunbatean jokatu zen Donostiako Trinitate plazan Igeldoko Harria sari nagusia

 

Txapelketa irabazteko faborito nagusia zen Jokin Eizmendi, eta ez zuen hutsik egin. Igeldoko Harriko txapela seigarrenez jantzi zuen harri-jasotzaile zarauztarrak, 14 jasoaldi lortuta, Donostiako Trinitate plazan.

Dena den, Jokin Eizmendik iaz baino jasoaldi bat gutxiago eman zion harriari eta gainontzeko partaideek ere harri horrekin eginak zituzten marken azpitik gelditu ziren.

Edozein kasutan, zarauztarrak ez zuen areriorik izan eta erraz nagusitu zen, bigarren eta hirugarren posturako lehia, ordea, borrokatuagoa izan zelarik.

Izan ere, lau partaide ibili ziren oso-oso paretsu. Bigarren postua Gorka Etxeberria oriotarrak eskuratu zuen, 12 jasoaldirekin, baina hirugarren posturako hiru lagun geratu ziren berdinduta 11na altxaldirekin: Mikel Lopetegi Urra zarauztarra, Xabier Peñagarikano Peña aizarnazabaldarra eta Imanol Illarramendi Kortaberri aiarra. Jasoaldietan berdinketa ematen bada, kilo gutxien duen kirolaria gailentzen da, beraz, Urrarentzat izan zen hirugarren tokia.

Ondorengo bi sailkatuak ere, Aimar Galarraga oriotarra eta Beñat Telleria, haiengandik oso gertu ibili ziren, bakoitza 10na jasoaldirekin.

SAILKAPENA

  1. Jokin Eizmendi: 14 altxaldi
  2. Gorka Etxeberria: 12. altxaldi
  3. Mikel Lopetegi Urra: 11 altxaldi
  4. Imanol Illarramendi Kortaberri: 11 altxaldi
  5. Xabier Peñagarikano Peña: 11 altxaldi
  6. Beñat Telleria. 10 altxaldi
  7. Aimar Galarraga: 10 altxaldi
  8. Alesandro Merlo: 8 altxaldi
  9. Jagoba Otaegi: 4 altxaldi
  10. Goenatxo III.a: 3 altxaldi

Iazko edizioa

2019an, Jokin Eizmendi izan zen ere Igeldoko Harria harri-jasotzaile probako garailea, aurten baino altxaldi bat gehiago eginda.

2019ko sailkapena:
1.- Jokin Eizmendi 15 jasoaldi
2.- Beñat Telleria 14 jasoaldi
3.- Gorka Etxeberria 13 jasoaldi
4.- Xabier Peñagarikano 11 jasoaldi
5.- Aimar Galarraga 11 jasoaldi
6.- Josu Urbieta 10 jasoaldi
7.- Jagoba Otaegi 9 jasoaldi
8.- Imanol Illarramendi 7 jasoaldi
9.- Mikel Lopetegi Gereka 6 jasoaldi

Share This