HERRI KIROLAK/SOKATIRA

Irailean jokatzekoa den Sokatira Mundiala ez dute atzeratuko momentuz

by | 2020/03/31

Irailerako aurreikusita dagoen Lur Gaineko (Outdoor) Sokatira Mundiala momentuz bere horretan mantentzen da

 

Euskal Herrian jokatuko da aurtengo lur gaineko mundiala, Getxon hain zuzen ere, irailaren 16tik 20ra bitartean.

Euskal Herriko selekzioa nazioartean aitortua izan zenetik, irailean jokatu beharrekoa da  Euskal Herrian lehiatzen den aurreneko nazioarteko selekzioen txapelketa. Aurretik, 1991. urtean Getxon jokatua zen goma gaineko indoor Munduko Txapelketa, eta 1995an lur gaineko Europako Txapelketa.

Martxoaren erdialdera egitekoa zen txapelketa jendaurrean aurkezteko ekitaldia bertan behera utzi badute ere, Getxoko Mundialaren antolatzaileek ez dute momentuz txapelketa bertan behera uzteko asmorik.

Hori dela eta, Nazioarteko Sokatira Federazioak (TWIF) egitasmoaren hasierako egutegia mantentzen du, eta beraz hurrengo egunetan izena emateko epea zabalduko da selekzioentzat zein klubentzat. Orotara, nazioarteko federazioa osatzen duten 72 nazioek izango dute txapelketan parte hartzeko aukera.

Bizi dugun egoera gordina izan arren, selekzio partehartzaileek hasiak dira jadanik hoteletako logelak erreserbatzen eta gaur gaurkoz txapelketa lehiatuko dela ez dago ezbaian.

Basque Country izenpean jokatzen ditu sokatirako txapelketa ofizialak Euskal Herriko selekzioak 2014az geroztik, Nazioarteko Federazioak (TWIF) eskubide osoko kide gisa onartu zuenean.

Azkoitian (Gipuzkoa) hasi, eta Ezkabarten (Nafarroa) amaitu ziren Euskal Herriko goma gaineko sokatira txapelketak eta gero jarraian izan genuen Irlandako Munduko Indoor Txapelketa.

Otsailean jokatu zen hain zuzen ere Letterkennyn (Irlanda) 2020k0 Goma Gaineko (Indoor) Munduko Txapelketa, eta euskal sokatiralariek hamalau domina irabazi zituzten: herrialdeka, lau zilarrezko eta bi brontzezko; eta taldeka, bi urrezko, bi zilarrezko eta lau brontzezko.

Taldeka zortzi domina eskuratu zituzten, eta euskal selekzioak, berriz, sei. Halere, munduko txapelketa batean urrezko domina eskuratu gabe jarraitzen du selekzioak eta  2018ko Txinako munduko txapelketako marka ere ez zuen hobetu euskal ordezkaritzak, orduan hamasei domina eskuratu zituzten eta (bi urrezko, zazpi zilarrezko eta beste zazpi brontzezko).

Share This