HERRI KIROLAK/AIZKORA

Iker Vicentek irabazi du Nafarroako aizkora txapelketa

by | 2020/12/07

Argazkiak: egursport.com

Iker Vicentek irabazi du seigarren aldiz segidan Nafarroako aizkora txapelketa

 

Pasa den igandean, abenduak 6, lehiatu zen Nafarroako Aizkora Txapelketa Doneztebeko Ezkurra pilotalekuan, goizeko 12:00tan hasita eta ikuslerik gabe (zuzenean emititu zen Federazioaren Youtube kanalaren bidez).

Iker Vicente (Otsagabia), Jon Rekondo (Leitza), Eneko Saralegi (Leitza), Oier Kañamares (Aroztegi) eta Julen Kañamares (Ruben Saralegiren lekua hartu zuen, honek azken orduan baja aurkeztu eta gero) aritu ziren nor baino nor gehiago txapela etxeratu nahian. Egin beharreko lanak honakoak: lau kanaerdiko, lau 60 ontzako eta bi oinbiko ahalik eta azkarren moztea.

Oraingoan ere, 23 urte dituen Iker Vicentek erabateko nagusitasuna erakutsi zuen eta seigarren aldiz jarraian irabazi zuen Nafarroako aizkora txapelketa, bere lana 30 minutu eta 44 segundotan amaituta. Jon Rekondo txapeldunordea hiru minutu eta hamasei segundora sailkatu zen eta Oier Kañamaresek osatu zuen podiuma.  Atzetik, Eneko Saralegi  eta Julen Kañamares sailkatu ziren, laugarren eta bosgarren postuan, hurrenez hurren.

Hasieratik jarri zen buruan Vicente, lehenengo enborra mozterako jadanik 17 segundoko aldea baitzuen eta bigarren kanaerdikoa ebakitzen amaitzerakoan berriz, 55 segundokoa, handik aurrera nagusitasunez joan zelarik aurkariekiko tartea haunditzen.

Aurten lorturiko seigarren txapel honekin, Iker Vicente laugarren postuan jarraitzen du txapelketaren sailkapen historikoan: lehenengo postuan Miel Mindegia dago hamar txapelekin, bigarren Floren Nazabal bederatzirekin eta hirugarren Donato Larretxea zortzirekin.

Nafarroako Lehen Mailako Aizkora Txapelketaren sailkapena

Iker Vicente Saralegi 30′ 44″

Jon Rekondo Salaberri 34′ 01″

Oier Kañamares Ibarra 39′ 04″

Julen Kañamares Mugertza 39′ 14″

Eneko Saralegi Martikorena 45′ 01″

Nafarroako Aizkora Txapelkeraren finalarekin batera, Nafarroako emakumezkoen arpana txapelketa ere jokatu zen Donezteben. Iraizoz ahizpak eta Alaitz Olano eta Olatz Altuna lehiatu ziren.

Denborak:

Ainhoa Irazoiz Cires eta Maria Irazoiz Cires  5′ 30″

Alaitz Olano Sotil eta Olatz Altuna Gaztelumendi 6′ 13″

Herri kirol jaialdia Mallabian

Herri kirol jaialdia Mallabian

Finalerako sailkatu dira Suharri Rodriguez-Jokin Urretabizkaia aizkoran eta Mikel Lopetegi Urra harrijasotzen

Share This