Pasa den igandean jokatu zen Sherpa.ai Aizkolari Txapelketa Nagusiko finala Bilboko Bilbao Arenan, bertan 3.000 lagun bildu zirelarik finala bertatik bertara jarraitzeko.

Iker Vicente eta Karmele Gisasola ziren faborito nagusiak eta biak aise nagusitu zitzaizkien aurkariei, hartara Vicentek iazko garaipena errepikatu duelarik, eta Gisasola berriz emakumeen aurreneko lehiaketan nagusitu delarik.

Gizonezkoen kasuan, txanda bakarrean sei finalistek hamabi enbor moztu behar izan zituzten: 54 ontzako lau, 60 ontzako lau eta 72 ontzako beste lau. Iker Vicente hasieratik nagusitu zen lehen enborretik alde haundiak hartuta, azkenean 39 minutu eta 37 segundu behar izan zituelarik lanak bukatzeko, honenbestez Otsagabiakoak bere hirugarren txapela jantzi duelarik.

Mikel Larrañaga sailkatu zen bigarren (41:57) eta Eneko Otaño hirugarren (43:14), iazko podiuma errepikatuz. Atzetik sailkatu ziren Aitzol Atutxa (44:32), Julen Alberdi Txikia IVa (45:53) eta Jon Irazu (54:15).

Emakumezkoetan berriz, hiru aizkolari aritu ziren lehian finalean: Karmele Gisasola Zelai III.a, Uxue Ansorregi eta Maika Ariztegi. Azkenean, Sherpa.ai txapelketaren historiako lehen txapela Karmele Gisasolarentzat izan zen, mallabitarrak oso final orekatua lehiatuta lortu zuelarik garaipena eskuratzea, 11:48ko denbora eginda. Minutu eta 15 segundutako aldea atera zion bigarren sailkaturiko Uxue Ansorregi (13.03) mendaroarrari eta 3 minutu eta 26 segundutako aldea Maika Ariztegiri (15.24).

Gizonezkoen sailkapena:

1- Iker Vicente: 39.37

2- Mikel Larrañaga: 41.47

3- Eneko Otaño: 43.14

4- Aitzol Atutxa “Atutxa III.a”: 44.32

5- Julen Alberdi “Txikia IV.a”: 45.53

6- Jon Irazu: 54.15

Emakumezkoen sailkapena:

1- Karmele Gisasola “Zelai III.a”: 11.48

2- Uxue Ansorregi: 13.03

3- Maika Ariztegi: 15.24.