EUSKAL PILOTA
Goikoetxea V.ak eta Barrenetxea IV.ak Txapelketako lehen lau puntuak eskuratu dituzte
Binakako 51. Erremonte Txapelketa Goikoetxea V.a eta Barrenetxea IV.aren garaipenarekin hasi da, 40-28 nagusitu baitziren Juanenea eta Aizpuru III.aren aurka, larunbat honetan Galarretan jokaturiko partida erakargarrian. Garaipen honekin, irabazleek txapelketako lehen lau puntuak eskuratu dituzte, eta galtzaileak hutsean geratu dira.
Partida parekatua izan zen 25-23ra arte. Aizpuru III.ak Barrenetxea IV.ari eutsi zion gehiago ezin izan zuen arte. Hortik aurrera, urdinen akats batzuek eta atzelari hernaniarraren joko bikainak erabaki zuten partida.
Hala ere, norgehiagokaren hasieran urdinak jarri ziren aurretik (0-5 eta 5-10) baina gorriek azkar erreakzionatu zuten eta hamabina berdintzea lortu zuten, 19-17koarekin bi tantoko errenta ere lortu zutelarik. Nolabaiteko oreka mantendu zen 25-23ra arte baina handik aurrera 15-5eko partzial batek itxi zuen partida.
Barrenetxeak gozatu egin zuen kantxa gainean. Jo, arriskatu eta konfiantza handiz aritu zen. Ederki jo zuen ezker pareta, eta Goikoetxearen laguntzaz txapelketako aurreneko garaipena erdietsi zuten. Urnietako aurrelariak zazpi tanto eta hiru akats egin zituen.
Urdinetan Juaneneak ez zuen lortu jokoaren erritmoa berak ezartzea. Gehiago jokatu zuten aurkaria zigortzera eta hor ez zuten ahuleziarik aurkitu. Zalantzarik gabe, atzelarien partida izan zen aurrelariena baino gehiago. Juaneneak hamar tanto egin zituen eta bi akats, eta Aizpuru III.ak lau tanto saketik eta zortzi piloteoan.
Binakako 51. Erremonte Txapelketako aurreneko jardunaldiko emaitzak:
Azaroak 6, Galarreta
- Zaldua II.a-Zubiri 40 Urrutia II.a-Martirena 19
- Goikoetxea V.a-Barrenetxea IV. 40 Juanenea-Aizpuru III.a 28 (TXAPELKETAKO PARTIDA)
- Segurola-Zaldua 40 Loitegi-Larrañaga 36
Emakume Master Cup txapelketa Villabonan
Bearzana pilotalekuan, pilota goxuarekin jokatutako eskuz binakako Emakume Master Cup txapelketako lau norgehiagoka izan ziren iragan larunbatean
Gipuzkoako xare txapelketako azken jardunaldia jokoan
Ligaxkako azken jardunaldia lehiatuko da larunbatean eta xarearen mendeurrenaren harira Arkupetik trinketera 1919-2019′ aldizkaria argitaratu dute Iruran
Emakume Master Cup Txapelketa Villabonan
Pilota goxua modalitateko bi partida izango dira larunbatean Villabonan eta Binakako Emakumea Pilotari Txapelketako bigarren edizioa hasiko da ostiralean