Pasa den ostiralean, martxoak 11, arratsaldeko 19:00etan, Bizkaia Frontoian, 2022ko palako banakakoaren finalerdietako ligako azken jardunaldia jokatu zen, Esteban Gaubeka eta Ibai Perezen artean.

Ibai eta Estebanek finalerako txartela zuten jokoan faboritorik gabeko norgehiagoka batean. Hil ala biziko partida izan zen, modalitateko bi espezialista onenen artean, txapel ugari lortu dituztenak, eta elkarren aurka jokatzera ohitutadaudenak.

Norgehiagoka berdinduta aurreikusten zen baina Ibai Perez ez zegoen %100ean osatuta bizkarreko lesiotik eta sestaoarra ez zen bere maila onenean aritu. Armintzako oilarrak odola usaindu zuen eta ez zuen barkatu. Argi eta garbi menderatu zuen partida eta ia ez zion aukerarik eman aurkariari. 

Lehen jokoan bakarrik ibili zen Ibai Perez bere ohiko mailatik gertu. Partidaren estreinaldian, sestaoarrak bere jokoa inposatzea lortu zuen eta, akats handirik egin gabe, 10-8 garaitzea lortu zuen. Eguneko bere poz bakarra izan zen. Hortik aurrera dena okertu zen.

Gaubekak fisiko itzela eta indar mental handia erakutsi zuen, lehendabiziko jokoa galdu ondoren eta handik aurrera erabat nagusitu zen. Azken bi jokoek ez zuten historiarik izan. Gaubeka eroso egon zen, agian gehiegi, eta Ibai Perezek, hitzordu honetara bizkarreko arazoekin iritsita, txinpartaka jokatu zuen. Armintzarrak, berriz, partidak aurrera ateratzeko moduari buruzko klase magistrala eman zuen eta garaipen erosoa eskuratu zuen. Hala ere, partida kalitate handikoa izan zen, eta meritu handiko tantoak egin zituzten biek ala biek.

Gauzak horrela, Pala banakakoaren finala Esteban Gaubekak eta Pablo Fustok jokatuko dute datorren larunbatean. Fustok bost txapela irabazitakoa da orainarte eta Gaubekak berriz sei txapela ditu jada etxean, eta emozioz beteriko lehia aurreikusten da inondik inora.

Bestalde, jaialdia Maldonadok eta Gordonek Ibarguren eta Urrutiaren aurka jokatu zuten lehia interesgarri batekin hasi zen. Venado Tuertoko aurrelaria eta Sopelako atzelaria jaun eta jabe izan ziren. Bigarren jokoan bakarrik egon zen oreka, baina beste hiruretan nagusitu ziren partida lau jokotan irabazteko.

Banakako Txapelketa – Finalerdietako 4. jardunaldiako emaitzak

Lehen partida:

Ibarguren-Urrutia: 1  Maldonado-Gordon: 3  (9/10,10/6,9/10,8/10)

Bigarren partida:

Ibai Perez: 1  Gaubeka: 3  (10/8,7/10,4/10,5/10)