Pasa den martxoaren 18an hasi zen emakumezkoen Bizkaia eskupilota Torneoaren laugarren edizioa dagoeneko azken txanpan dago.

Antolatzaileen arabera, txapelketa honetan behintzat, zortzi emakume kirolari hauek ez dute jokatu zaletasunagatik eta pasioagatik bakarrik. Izan ere, erakundeen ardura da bermatzea Bizkaiko emakume kirolariek lan-baldintza egokiekin jokatu ahal izatea. Emakumeak kirolean aritzeko eragozpenak ezabatu behar dira; pizgarriak eman behar dira emakumeek kirolean jarduteko eta, are gehiago, profesional modura jokatzeko, kasu honetan esku-pilotan.

Txapelketan aritu diren lau bikoteak honako hauek izan dira: Aldai eta Mendizabal; Arrizabalaga eta Agirre; Garai  eta Gaminde; eta, azkenik, Larrarte eta Oses.

Lehenengo jardunaldi horren ondoren, martxoaren 25ean Zallan eta apirilaren 1ean Zierbenan jokatu ziren hurrengo saioak. Hilaren 8an berriz, finalerdien txanda izan zen, non Aldai-Mendizabal vs. Larrarte-Oses eta Garai-Gaminde vs. Arrizabalaga-Agirre partidak lehiatu ziren.

Lehen finalerdian, Aldai-Mendizabal bikoak 22-8 irabazi zien Larrarte eta Osesi. Amaia Aldaik jokaturiko partida bikainari esker garaipen erosoa lortu zuten ezer gutxi egin ahal izan zuen bikote gipuzkoarraren aurka.

Bigarren finalerdian, Garai-Gaminde bikoa Arrizabalaga eta Agirreren aurka nagusitu zen (22-8) hasi eta buka menperatu zuen norgehiagokan.

Azkenean beraz, finala datorren larunbatean, apirilak 23, jokatuko da, bertan Aldai eta Mendizabal Arrizabalaga eta Agirreren kontra lehiatuko direlarik, Bizkaia frontoian. Hirugarren eta laugarren postuetarako partida Garai – Gaminde bikoteak eta Larrarte – Oses bikoteak jokatuko dute, arratsaldeko 15:15ean.

Partidak ikusteko sarrerak Bizkaia frontoiko leihatilan egongo dira salgai hiru euroan. Emakumeen Esku-pilotako IV. Bizkaia Txapelketako finala zuzenean emango du ETB 1ek.