Athletic eta Osasuna lehiatuko dira aurtengo VIII. Euskal Herria Txapela / Euroeskualdeko Kopako finalean

Gaur aurkeztu da VIII. Euskal Herria Txapela / Euroeskualde Kopako 2023/24 edizioaren finala. Abuztuaren 3an, larunbatarekin, lehiatuko dira Athletic eta Osasuna Barakaldoko Lasesarre futbol zelaian, 20:30etik aurrera. Izan ere, biek lortu dituzte puntu gehien aurtengo denboraldiko sailkapenean: Athleticek 13 puntu eskuratu ditu eta Osasunak, 11. Sailkapeneko lehen postuan izanik, Athletic hartuko da etxeko taldetzat.

Aurkezpena Lasesarre futbol zelaian egin da, Barakaldon. Bertan izan dira Euskal Herria Kirolaren ordezkari Eba Ferreira eta Ibon Barberiarekin batera, Jose Angel Iribar, Athletiren izenean; Baracaldo Futbol Taldeko presidente Ricardo Arana, eta Barakaldoko alkate Amaia del Campo.

Finala

Arestian esan bezala, finala abuztuaren 3an jokatuko da, Lasesarre futbol zelai honetan. 20:30ean hasiko da.

ETBk zuzenean emango du finaleko partida osorik.

Partidak 90 minutu iraungo du eta ez da luzapenik izango. Berdinketarik egonez gero, penalti jaurtiketan ebatziko da.

Epaileak FEFek izendatuko ditu, legeak eskatzen duen bezala.

Sarrerak

Sarrerak salgai daude Internet bidez. Dagoeneko ehkirola.eus webgune honetan bertan eros daitezke. Lasesarre futbol zelaiko takiletan ere zuzenean erosi ahal izango dira finalaren aurreko egunetan eta partidaren egunean bertan ere.

Tribunetako sarrerak 25 eurotan salduko dira.  Alboetakoak, 20 eurotan. Eta 16 urte artekoentzat, 10 eurotan.

Omenaldiak

Euskal Herria Kirolaren balioak irudikatzen duten kirolariak omendu ohi dira txapelketako finalean. Aurtengoan Mikel Balentziaga omenduko du Euskal Herria Kirolak, elkarteak berak lantzen dituen balioekin bat adierazitako konpromiso pertsonalagatik. Ohorezko sakea egingo du finalean, eta txapela jantziko dio irabazleari. Lehen txapela ere berak jantzi zuen gainera, Irunen, 2018ko bigarren edizioan, 1. edizioko finala bertan behera geratu ostean.

Jagoba Arrasate eta Raul Garcia ere gogoan hartuko dira finalean. Hasiera batean bertan izatekotan zeuden baina azkenean ez dute final egunean Lasesarren izaterik. Hartara, beraien ibilbideak eta jokabideak gogoratu egingo dira finalean.

Zozketak

Zozketa erakargarriak egingo dira bertaratutakoen artean. Bina lagunentzako otorduak zozkatuko dira honako jatetxe hauetan: 

• GALTZAGORRI jatetxea (Barakaldo)
• PUNKYNTXE jatetxea (Barakaldo)
• AITXIAR jatetxea (BIlbo)
• LURRINA jatetxea (Bilbo)
• HAPPY RIVER jatetxea (Bilbo)
• KERREN erretegia (Bilbo)
• BOROA jatetxea (Boroa)
• ANDRAMARI jatetxea (Galdakao)
• GAMINIZ jatetxea (Zamudio)

Adi egon, beraz, Lasesarrera finala ikustera joandakoak, zozketako sariak bertako megafoniatik jakinaraziko baitira partidaren atsedenaldian.

Jarraian, saridunak ehkirola.eus webgune honetako hasierako orrian jarriko dira.

Saridunek Lasesarre futbol zelaiko bulegoen sarreran jaso beharko dituzte sariak partida amaitu ondoren.

Deialdia zaletuei

Euskal Herria Kirolak futbolzaleei dei egin die abuztuaren 3an Lasesarren jokatuko den partidara joan daitezen. “Inportantea da, kirol eta gizarte ikuspegitik gero eta garrantzi handiago duen Euskal Herria txapelketako finala, egun hurbilen baten, gure zelai handienetakoren batean joka dadin”.

XIV. Euskal Herria Kopa

Beste alde batetik, aurten ere Euskal Herria Kopa jokatuko da, XIV. edizioa hain zuzen. Euskal Herriko emakumezko futbol talderik onenak lehiatuko dira. Laster zabalduko ditugu txapelketa horren nondik-norakoak.

eitb.eus