Antolakuntzak jakinarazi duenez, itsas zeharkaldiaren 50. urteurreneko proba 2021eko uztailera atzeratzea erabaki dute

Uztailaren 25ean zen jokatzekoa Getaria-Zarautz itsas zeharkaldiaren 50. urteurreneko proba, baina egoerak hala bultzatuta, azkenean ez da posible izango aurten lehiatzea.

COVID-19a eragin zuen egoeraren aurrean, iragan martxoaren 26an ateratako azken oharrean, 50. edizioa bere horretan mantentzen zutela jakinarazi zuten, data berdinetan gainera, uztailak 25-26, alegia.

Orain zabaldutako agirian diotenez, haien esku zegoen guztia egin dute zeharkaldia aurten egin ahal izateko, baina bizi ditugun baldintza hauetan, ezinezkoa egin zaie aurreikusita zuten programarekin jarraitzea, eta 50. urteurrenak trataera berezia merezi duela kontutan hartuta, datorren urterarte atzeratzeko deliberoa hartu dute.

Izena emanda duten igerilariek bi aukera izango dituzte, batetik, datorren urtean ospatuko den 50 urteurrenerako izen-ematea mantendu, eta, bestetik, izen-emate kuota itzultzea eskatu eta baja eman.

Izen-ematea mantentzeko erabakia hartuko duten igerilariek, ez dute gestiorik egin beharko, baina baja eman nahi dutenek, 15 eguneko epea izango dute haien asmoa jakinarazteko. Edozein kasutan, antolatzaileek posta elektroniko bat bidaliko diete hurrengo egunetan, izen-emateen plataformatik jarraitu beharreko pausoak adieraziz.

Bestalde, datorren urtean berriz ere izen-emateak irekiko dira orain libre geratzen diren plazekin, beti ere gaur egungo prezioak mantenduz (bigarren fasea).

Antolakuntzatik hurrengo urtean burutuko den probara batzeko deia luzatu dute, baina hala ere, igerilariek entrenatzen jarraitu eta ur irekietako igeriketaz gozatu dezaten, proba berri bat antolatzeko aukera aztertzen ari direla aipatu dute, beti ere egoerak uzten badu eta arauak errespetatuz (azaldu dutenez, hurrengo egunetan emango dituzte xehetasun gehiago).

Azkenik, eskerrik beroenak helarazi dizkiete babesleei, kirolariei zein zaleei, guztiek leial jarraituko dutelakoan itsas zeharkaldiaren antolatzaileekin elkarlanean.

Getaria-Zarautz Zeharkaldia

Getaria-Zarautz estatu mailako itsas zeharkaldirik handienetakoa da. Izan ere, 3.300 igerilarik baino gehiagok parte hartzen dute, eta ondorioz, prestigio handia du.

2.850 metrotako distantzian lehiatzen den proba honek 50 urte bete berri ditu eta eskarmentu handia du. Igerilarien artean ere oso estimatua da, maila altuko kirola eta izaera herrikoia uztartzen jakin baitu.