HERRI KIROLAK/HARRIA

Binakako harri-jasotze txapelketako 7. saioa jokatu zen Albainan

2020/11/18

Argazkiak: egursport.com

Pasa den igande eguerdian Albainan (Trebiñu) jokatu zen aizkolari, harri-jasotzaile eta lasto-altxatzaileak bildu zituen herri kirol jaialdia

 

Binakako harri-jasotze txapelketako saioan, Julen Diaz eta Jagoba Otaegi elkarrekin aritu ziren, eguerdiko hamabietatik aurrera (Jagoba Otaegik gaixo dagoen Mikel Lopetegi “Urra” ordezkatu zuen). 2020 Binakako Harri-jasotze Txapelketa “Gruas Iru Saria”-ren 7. jardunaldia zen honakoa, eta bi aizkolariek guztira 6.529 kilo altxatu zituzten, 57 jasoaldi eginda.

Bi harri-jasotzaileak 175 kiloko laukizuzenarekin, 138 kiloko kubikoarekin, 100 kiloko zilindro zaharrarekin eta 100 kiloko borobilarekin aritu ziren, bina minutuko txandetan.

Julen Diazek, 175 kiloko laukizuzenari 7 jasoaldi eman zizkion (1225 kilo) eta 138 kiloko kubikoari 8 (1104 kilo). Jagoba Otaegik bere aldetik, 100 kiloko zilindroari 25 altxaldi eman zizkion (2500 kilo) eta 100 kiloko bolari 17 (1700 kilo).

Binakako Harri-Jasotze Txapelketako hurrengo jardunaldia Pobesen lehiatuko da datorren igandean, azaroak 22, eguerdiko 12:00tan hasita, bertan, Jokin Eizmendi eta Gorka Etxeberria elkarrekin arituko direlarik.

Pobeseko herri-kirol jaialdian, Aizkolari Gazteen Binakako Txapelketa ere jokatuko da, elkarren aurka arituko diren bikoteak honakoak izango direlarik: Hodei Ezpeleta-Axel Larrañaga, Suharri Rodriguez-Jokin Urretabizkaia eta Joxan Etxeberria-Endika Goia.

Aurretik, Urrezko Aizkolari Kopako hirugarren kanporaketa lehiatu zen, non lau aizkolari aritu ziren nor baino nor gehiago lehian: Ugaoko Aritz Irazabal, Zigako Joxean Etxeberria, Arostegiko Oier Kañamares IV.a eta Arribeko Txomin Amundarain. Azkenean Kañamares IV.ak eskuratu zuen hurrengo kanporaketarako txartela.

Bukatzeko, Albainako saioan, lasto-altxatze lanetan Garbiñe Lopez de Uralde eta Ruth Linaza aritu ziren.  30 kiloko lasto-piloari 22 jasoaldi eman zizkion Lopez de Uraldek, eta Linazak berriz 19.

HERRI KIROLAK/HARRIA

Share This