Altsasuk merezitako amaiera emango dio Nafarroako Foru Komunitateko Txapelketa arrakastatsuari datorren igandean jokatuko diren palako finalekin.

 

 

Zalantzarik gabe, Nafarroako Foru Komunitateko Txapelketaren bigarren edizio hau emakumezkoen pilota egutegiko ekitaldi garrantzitsuenetako bat bezala finkatu da. Nafarroa Arenan esku-huskako finalez gozatzeko bildu ziren 1.600 pilotazaleak mugarri izan ziren emakumezkoen pilotaren barruan, eta Altsasuk amaiera emango dio aurtengo ekitaldiari, igande honetan, palako, modalitaterik parte hartzaileenaren finalekin. Orotara 54 pilotari elkarren aurka aritu dira, hiru mailatan banatuta.

 

Azkenean, sei bikotek borrokatuko dute Altsasun txapela preziatuak lortzeko. Burunda ez da Navarra Arena bezain handia, baina tradizio handia du Nafarroako pilotan, eta dotore egongo da bere birgaitze-lanen ondoren.

 

Navarra Televisioneko kamerak zuzenean direla, jaialdia gaztetxoen finalarekin hasiko da, Urgoiti-Bengoetxea kadeteak Arrosagarai-Rio Booren aurka. Quevedo-Sarasibarrek Otxoa-Eizagirreren aurka neurtuko dituzte indarrak 22 urtez azpikoetan eta eliteko finalistak Gorostiaga-Igoa eta Espinal-Saez izango dira. Ikus daitekeenez, eliteen finalak lehen mailako ikuskizun bat eskaintzeko osagai guztiak ditu, maila goreneko palistekin eta Paula Gorostiaga gaztearekin. Azken honek zeresan handia emango zuela agintzen zuen txapelketa hasi aurretik eta bere maila bikainarekin aurreikuspen guztiak bete ditu.

 

Sei protagonistak arratsaldean Altsasun egin den finalen aurkezpenean elkartu ziren, itzal bila, Foru Plazara eraman behar izan zutelarik ekitaldia. Protagonistekin batera, Miguel Pozueta, Nafarroako Kirolaren Institutuko zuzendaria; Javier Conde, Nafarroako Pilota Federazioko presidentea; Javier Ollo, Altsasuko alkatea; Begoña Goikoetxea, Altsasuko Udaleko Berdintasun eta Kirol zinegotzia; eta Izaskun Erdozia, Laboral Kutxako Altsasuko bulegoko zuzendaria izan ziren. Ordezkari horiek guztiek txapelketan zehar pilotariek eskaini duten maila azpimarratu zuten, eta igandean finaletan kirolariei laguntzera animatu zituzten pilotazaleak, ziur baitaude ikuskizunak eta giroak asko mereziko dutela.