HERRI KIROLAK/AIZKORA

Abiatu da Euskal Herriko hirugarren mailako aizkora txapelketa

by | 2020/10/19

Argazkiak: egursport.com

Euskal Herriko hirugarren mailako aizkora txapelketako finalerako txartela lortu dute Arribeko Txomin Amundarainek eta Julen Olano leitzarrak

 

33 aizkolarik izena emana dute aurtengo Euskal Herriko hirugarren mailako aizkora txapelketan aritzeko eta horren ondorioz, guztira hiru kanporaketa egingo dira. Kanporaketa bakoitzean lehenengo bi postuetan sailkatzen diren aizkolariak finalerako.

Arabako Burgelu herrian jokatu zuten pasa den igandean hamaika aizkolarik, lehiaketako aurreneko kanporaketa. Bakoitzak lau kanaerdiko (54 ontzakoak) moztu behar zituen eta bi lehenbiziko postuetan Arribeko Txomin Amundarain (9 minutu eta 59 segundo) eta Leitzako Julen Olano (10 minutu eta 8 segundo) sailkatu ziren, hartara biek eskuratu zutelarik finalean aritzeko eskubidea.

Atzetik sailkatu ziren David Naredo asturiarra (10’33”), Jokin Urretabizkaia gipuzkoarra (10’50”), Jokin Alkizalete gipuzkoarra (11’03”), Beñat Lekua bizkaitarra (12’57”), Ibon Garaiburu gipuzkoarra (13’ 40”), Xabier Garcia ‘Utxu’ bizkaitarra (14’05”), Daniel Lopez asturiarra (14’30”) eta Aritz Oregi bizkaitarra (14’56”). Arostegiko Xuban Kañamares V.ak ez zuen parte hartzerik izan, gaixorik zegoelako.

Igande honetan lehiatutakoaren ondotik, hurrengo asteburuan, urriaren 24an eta 25ean jokatuko dituzte beste bi kanporaketak, hauek ere Araban.

Larunbatean 18:30ean, Aguraingo pilotalekuan arituko dira hamaika aizkolari: bi napar (Jon Telletxea Juanena eta Goizeder Belza Igoa), bost gipuzkoar (Jon Esnal Odriozola, Markel Zapiain Mujika, Suharri Rodriguez Salaberria, Unai Otaegi Saizar eta Urtzi Olasagasti Korta) eta Segoviako (Espainia) beste lau aizkolari ariko dira: Alvaro García Hoyuelos, Hermenegildo Herrero González, Marco Nevado Jabonero eta Emilio Garcia Herranz.

Igandean aldiz, eguerdiko hamabietan Aramaion arituko direnak honakoak: hiru aizkolari nafar (Oier Larretxea Agirre, Ibai Soroa Mugertza eta Iker Gorriti Borreguero), Arabako Luis Polanco Aldasoro, Bizkaiko Beñat Amade Fullando eta Mikel Agirre Unamuno eta Gipuzkoako Aitor Urteaga Aldasoro, Axel Larrañaga Barrenetxea, Iñigo Landa Larrañaga, Unai Zabala Zubelzu eta Julen Aranberri Ocaña.

 

Share This