HERRI KIROLAK/AIZKORA/HARRIA

Urrezko aizkolari txapelketako jardunaldi bikoitza lehiatu da

by | 2022/05/10

Argazkiak: egursport.com

Urrezko banakako aizkolari txapelketako jardunaldi bikoitza lehiatu zen pasa den asteburuan: larunbat arratsaldean Arribe-Atallun aritu ziren eta igande eguerdian Getarian (Gipuzkoa), Antxua Egunaren barruan.

Larunbat arratsaldean Arribe-Atallun

Arribe-Atalluko larunbateko jardunaldian bederatzi aizkolari aritu ziren final-laurdenetarako hiru txartelen bila. Hirunaka aritu ziren lehian, batetik Borja Fernandez, Jon Rodriguez eta Julen Olano, bestetik Julen Gabirondo, Ibai Soroa eta Xuban Kañamares, eta azkenik Eneko Saralegi, Daniel España eta Txomin Amundarain.

Bigarren fasera sei aizkolari sailkatu ziren eta haien artean binakako kanporaketetan zehaztu ziren azken hiru sailkatuak: Xuban Kamañares V.ak Julen Olanori irabazi zion, Ibai Soroak Eneko Saralegiri eta Txomin Amundarainek Jon Rodriguezi.

Gizonezko aizkolariez gain, emakumezkoen harri-jasotze txapelketaren barruan, Marina Blanco palentziarra 63na kiloko harri kubikoarekin eta borobilarekin aritu zen. Guztira 20 jasoaldi burutu zituen, 7 kubikoari eta 13 bolari.

Getariako Antxua Egunean igande eguerdian

Urrezko banakako aizkolari txapelketak segida izan zuen igande eguerdian Getarian. Hemen sei aizkolari lehiatu ziren final laurdenetako hiru txartelen bila: Joxean Etxeberria, Ioritz Gisasola Zelai IV.a, Oier Kañamares IV.a, Ugaitz Mugertza II.a, Suharri Rodriguez Paolla eta Julen Alberdi Txikia IV.a. Azkarrenak honakoak izan ziren, hartara txapelketan aurrera egitea lortu zutelarik: Txikia IV.a (12.39), Mugertza II.a (12.19) eta Paolla (12.39).

Gizonezkoez gain, emakumeak ere aritu ziren aizkoran Getarian, emakumezkoen banakako aizkolari txapelketan. Karmele Gisasola Zelai III.a mallabitarrak lortu zuen hurrengo kanporaketarako txartela 9.51ko denbora eginda, Uxue Ansorregi (Mendaro), izan zen bigarren (11.20) eta Beatriz Tanco (Murillo el Fruto) hirugarren (13.23).

Emakumezkoen harri-jasotze txapelketan, berriz, Lur Errekondo eta Lucia Orbe aritu ziren, 63na kiloko harri kubikoarekin eta borobilarekin. Orbek 35 jasoaldi eman zituen denera (13 kubikoari eta 22 bolari) eta Errekondok 29 (11 kubikoari eta 18 bolari).