HERRI KIROLAK/SOKATIRA

Nafarroako launakako sokatira txapelketa abian da

by | 2021/04/19

Joan zen larunbatean hasiera eman zioten Nafarroako lauko sokatira txapelketari, Berriozarren aurreneko jardunaldia lehiatuta

 

Lehen saio honetan, emakumezkoak 255 kiloetako pisuan, eta gizonezkoak 320koan, aritu ziren nor baino nor gehiago, aurreko txapelketetan izandako garaipen boladari jarraituta Beti Gazteko lesakarrak bietan nagusitu zirelarik.

Beti Gazteko emakumezkoek zein gizonezkoek tiraldi guztiak irabazi zituzten pisu astuneneko lehen jardunaldi honetan, eta txapela eskuratzeko pausu garrantzitsua eman zuten.

Larunbateko jardunaldian, emakumezkoetan, Beti Gazte (12 puntu) izan zen garailea, bigarren Txantrea izan zen (9 puntu), hirugarren Berriozar (6), laugarren Antsoain A (3 puntu) eta bosgarren Antsoain B (0 puntu).

Gizonezkoetan berriz, Beti Gazteren atzetik (12 puntu), Txantrea A (9 puntu), Berriozar (6 puntu), Txantrea B (3 puntu) eta Antsoain (0 puntu) sailkatu ziren.

Kategoria hauetako bigarren eta azkeneko jardunaldia apirilaren 24an, larunbatean 17:00etan hasita jokatuko dute Lesakako udal pilotalekuan.

Aurrerago, maiatzaren 1ean, Txantrean txapelketa mistoa jokatuko da (280 kilotan). Bina talde aterako dituzte Beti Gaztek, Txantreak, Berriozarrek eta Antsoainek eta beraiekin batera Araxes ere lehiatuko da. Gainera, egun horretan 20 urtez beheitiko eta kadete mailako txapelketako lehen jardunaldia ere jokatuko da.

Txapelketako egutegiarekin jarraituta, maiatzaren 8an, oraindik zehaztu gabeko plazan, emakumezkoen eta gizonezkoen pisu arinetako (235 eta 300 kilo) lehen jardunaldia eta 20 urtez azpiko zein kadete mailako txapelketaren bigarren jardunaldia jokatuko dituzte.

Azkenik, maiatzaren 15ean jokatuko dute azkeneko jardunaldia Antsoainen, bertan emakumezkoen 235 kiloko eta gizonezkoen 300 kiloko txapela erabakiko delarik. Halaber, 20 urtez azpikoek zein kadeteek hirugarren jardunaldia lehiatuko dute, eta jarraian, lehen bi sailkatuen arteko finalak izango dituzte.