EUSKAL PILOTA

Nafarroako erremonte txapelketako aurkezpena egin dute

2020/08/12

Argazkiak: Euskal Jai Berri

Nafarroako hamabosgarren erremonte txapelketa aurkeztu zuten atzo Iruñean, Nafarroako Gobernuko Turismo Departamentuaren egoitzan

 

Ostiral honetan hasi eta urriaren 10ean amaituko den txapelketan bost bikotek hartuko dute parte: Zeberio II.a-Garces, Uterga-Otano, Ezkurra II.a-Barricart, Matxin III.a-Azpiroz eta Aldabe-Ion.

Partidak 35 tantora jokatuko dira eta ligaxkako puntuazioa honela osatuko da: partida irabazteak 4 puntu emango ditu, 33 tanto egiten dituen galtzaileak 2 lortuko ditu, 31 egiten dituenak 1, eta 30 edo gutxiago egiten dituenak, bat ere ez.

Hasteko, bost bikoteak ligaxka batean neurtuko dira denak denen aurka. Azken postuan amaitzen duena txapelketatik at geratuko da eta lau onenek finalerdiak jokatuko dituzte (sailkapenaren lehenengoa laugarrenaren aurka eta bigarrena hirugarrenaren kontra), Tafallan urriaren 2an eta 3an, eta finala urriaren 10ean jokatuko da Zubirin.

Txapelketa asteburu honetan bertan hasiko da Lekunberrin: ostiralean 19:00etatik aurrera, Zeberio II. eta Garces, Aldabe eta Ionen aurka neurtuko dituzte indarrak. Larunbatean 22:00etan, berriz, Uterga eta Otano, Matxin III.a eta Azpirozen kontra arituko dira.

Hurrengo jardunaldia Donezteben lehiatuko da abuztuaren 21ean eta 22an. Ostiralean 22:00etan, Ezkurra II.a eta Barricart, Matxin III.a eta Azpirozen contra eta larunbatean, ordu berdinean, Uterga eta Otano, Aldabe eta Ionen kontra.

Ondoren, Agoitzen (abuztuak 28 eta 29), Uharte-Arakilen (irailak 11), Arbizun (irailak 12) eta Garesen (irailak 18 eta 19), jokatuko dituzte final laurdenetako partidak. Final nagusia urriaren 10ean izango da Zubirin.

Ligaxkako asteburu bakoitzeko jardunaldientzako sarrera 10 eurotan egongo dira salgai eta bi egunetako partidak, ostiral zein larunbatekoa, ikusteko aukera emango du. Finalerako sarrera aldiz, 5 eurotan salduko da. Txapelketa osoan lortzen dirua ADANO proiektua sustatzeko erabiliko da.