EUSKAL PILOTA

Irazustabarrena-Arrillaga eta Galdos-Mendizabal bikoteak, finalera

2021/04/25

Argazkiak: Bizkaia Frontoia

Larruzko Pilotako III. Bizkaia Paleta Txapelketan sei bikote aritu dira nor baino nor gehiago guztira lau jardunaldi izango dituen lehiaketan: Nagore Martin-Leire Etxaniz, Uxue Agirresarobe-Maialen Landajo, Leire Galdos-Maider Mendizabal, Udane Iturbe-Olatz Zulaika, Amaia Irazustabarrena-Miriam Arrillaga eta Itsaso Erasun-Miren Larrarte.

Lehenengo saioa Larrabetzuko pilotalekuan jokatu zen apirilaren 10ean honako emaitzak eman zirelarik: Nagore Martin eta Leire Etxanizek 2-0 (12-3 eta 12-2) irabazi zioten Uxue Agirresarobe-Maialen Landajo bikoteari eta Leire Galdos eta Maider Mendizabalek 2-0 (12-6 eta 12-9) irabazi zieten Udane Iturbe eta Olatz Zulaikari.

Bizkaia torneoaren bigarren jardunaldia apirilaren 17an lehiatu zen, Bizkaia Frontoian, arratsaldeko 17:00tan hasita. Bigarren jardunaldian ere bi partida jokatu ziren, alde batetik Irazustabarrena eta Arrillagak 2-0 (12-3, 12-6) irabazi zieten Agirresarobe-Landajori  eta bestetik Larrarte-Erasun bikoteak Iturbe eta Zulaika mendean hartu zituen 2-0 (12-4 eta 12-6).

Azkenik, pasa den larunbatean, apirilak 24, txapelketako aurreko fasearen hirugarren saioa izan zen, bertan erabaki zelarik final haundian izango diren bikoteen izena. Aurreneko lehian, Nagore-Etxaniz bikoak Irazustabarrena eta Arrillagaren aurka 2-0 (12-8, 12-5) galdu zuen eta bigarren partiduan berriz, Galdos eta Mendizabal  2-0 (12-10, 12-11) nagusitu ziren  Larrarte-Erasun bikoaren kontrako norgehiagokan.

Gauzak horrela, datorren igandean jokatuko den final haundirako sailkatu dira Leire Galdos-Maider Mendizabal eta Amaia Irazustabarrena-Miriam Arrillaga bikoteak.

Aurretik hirugarren eta laugarren postua zehazteko lehia izango da, non Nagore Martin-Leire Etxaniz eta Itsaso Erasun-Miren Larrarte bikoek indarrak neurtuko dituzten, eguerdiko 12:00tan hasita.