EUSKAL PILOTA

Iker Espinal da kaiolako Elite lehiaketako txapeldun berria

2021/02/14

Argazkiak: euskalpilota.org

Pasa den ostiralean, otsailak 12, arratsaldeko 19:00etan hasita E.H-ko Elite 4 ½ txapelketako finala eta 3. eta 4. postua zehazteko partida jokatu ziren Laudioko Aretako pilotalekuan.

Iker Espinal (Uharte) nafarrak eta Gaizka Karregal (Adiskide) bizkaitarrak jokatu zuten finala. Bi pilotariak txapelketa bikaina eginda iritsi dira finalera, beraien norgehiagokak nagusitasunez irabazita. Espinalek 22-06 irabazi zion finalerdia Behar Zana klubeko Eneko Maizi eta Karregalek 22-09 oso arriskutsua den Aitor Etxebarriari (Lemoa).

Covid-19a eta hortik eratorritako osasun alerta gogor erasotzen ari zaio afizionatu mailako pilotari eta apenas dago lehiaketarik. Horrexegatik eta bi finalistek, Iker Espinal nafarrak eta Gaizka Karregal bizkaitarrak, azkenaldian erakutsitako maila onarengatik, ikusmina piztua zuen  Lau eta Erdiko Txapelketako finalak.

Aurtengo finala oso irekia zegoen beraz, bi pilotariak oso joko puntu onean iristen baitziren partida erabakigarrira. Gaizka Karregalek erakutsi du maila honetako txapelketak eta partiduak jokatzeko guztiz prest dagoela eta nola ez Iker Espinal, azkeneko hilabeteotan aurrelari finena izan denak.

Azkenean, Iker Espinalek jantzi zuen txapela, Karregali 22-18 irabazita. Partida polita izan zen eta orekatua. Gaizka Karregal galdakoztarra aurretik joan zen markagailuan 15. tantora arte. Handik aurrera ordea, nafarra nagusitu zen jokoan eta azkenean txapela eraman zuen etxera.

Finalaren aurretik, hirugarren posturako lehia jokatu zuten Eneko Maiz eta Aitor Etxebarriak. Hemen ere ez zen faborito argirik eta edozeinen alde erori zitekeen lehia. Aitor Etxebarria eskura izan zuen garaipena 13-18 aurretik jarri zelarik baina Maizek markagailua irauli zuen eta azkenean billabonatarrak irabazi zuen partidua 22-20.

E.H-ko 4 1/2-ko ELITE Txapelketa

Txapelketako finalaurrekoen emaitzak honakoak izan ziren:

Lehengo final-laurdena: 2020/12/18 Aurrekoetxea (Lemoa) 14 Maiz (Behar-Zana) 22

Bigarren final-laurdena: 2021/01/08 Espinal (Uharte) 22 Ibañez (Zaramaga) 2

Hirugarren final-laurdena: 2021/01/15 Karregal (Adiskide) 22 vs Ongay (Irurtzun) 19

Laugarren final-laurdena: 2021/01/22 J. Alberdi (Tolosa) 18 A. Etxebarria (Lemoa) 22

Emaitza hauen ondorioz, finalerdietako norgehiagokak zehaztuta geratu ziren: aurreneko finalaurrekoan, Maiz (Behar Zana) eta Espinal (Uharte) aritu ziren elkarren aurka eta bigarren finalerdian Karregal (Adiskide) eta Etxebarria (Lemoa) neurtu zituzten indarrak:

Maiz (Behar-Zana) 06  Espinal (Uharte)    22

Karregal (Adiskide) 22  A.Etxebarria (Lemoa) 09

3. eta 4. postuak zehazteko partidua

Maiz (Behar-Zana) 22  A.Etxebarria (Lemoa) 20

Finala

Espinal 22 (Uharte)  Karregal (Adiskide) 18